Album vun der Woch Nite Jewel: Minimalistesch Eleganz ouni Pathos

Dee neien Album "No Sun" vum Nite Jewel ass ënnert anerem d'Resultat vun enger Recherche iwwer Stereotyppen an Traditiounen. E stellt awer och d'Ausernanersetzung vun der Kënschtlerin mam eegenen Divorce duer. Eng komplex Affär also, déi awer fiederliicht an den Ouere kléngt.

Vicky Stoll / cz

Nite jewel - no sun

Deen neien Album "No Sun" vum Nite Jewel ass ënnert anerem d'Resultat vun enger Recherche iwwer Stereotyppen an Traditiounen. E stellt awer och d'Ausernanersetzung vun der Kënschtlerin mam eegenen Divorce duer. Eng komplex Affär also, déi awer fiederliicht an den Ouere kléngt.

Déi zwee Lidder, déi dee neien Album "No Sun" vun der Nite Jewel arummen, faassen d'Grondstëmmung vun der Plack. "When There is No Sun" - "Wann d'Sonn fort ass" - , sou heescht beispillsweis dee leschten Track, eng jazzeg, extreem däischter an desillusionéierend Coverversioun vun engem Lidd vum avantgardistesche Museker Sun Ra.

Den alleréischte Song um Disc, "Anymore", ass entstanen, wéi d'Kënschtlerin ugesat huet, fir en neit Lidd ze schreiwen. Si huet misse feststellen, datt si net méi weess, wéi dat eigentlech geet. Zu dësem Zäitpunkt stécht si an enger déiwer Kris, hire Mann a si hu sech no 12 Joer getrennt an den Drock vum Label fir frësch Musek wiisst.

Hannert dem Kënschternumm Nite Jewel stécht déi kalifornesch Kënschtlerin Ramona Gonzalez, déi niewent hirer musikalescher Karriär och eng akademesch Karriär verfollegt. Si huet e Bachelor an der Philosophie, sëtzt momentan un engem PdD an der Musikologie a gëtt niewelaanscht zu Los Angeles um Occidental College Coursen am Songwriting.

Een immens ronnen an opgeschlossenen Album

Hir perséinlech Erfarung mat der Trauer opgrond vum Divorce huet dozou gefouert, datt d'Ramona Gonzalez sech mat der Stereotypiséierung vun der weiblecher Stëmm am Pop auserneegesat huet. Als Fan vun de grousse Pop-Diven wéi dem Whitney Houston an dem Mariah Carey ass der Ramona Gonzalez opgefall, datt et grouss Parallelle gëtt zu der anticker Traditioun vum Lamentéieren, vum kathartesche Selbstrengegungsritual, bei deem queesch duerch d'Kulture Mënschen - dacks Fraen - hir Trauer duerch Gesang bewältegen. Dës Recherche an d'Opschaffe vun den eegene Gefiller hunn zu engem immens ronnen an opgeschlossenen Album gefouert, deen och de Versuch vun enger Äntwert duerstellt op d'Fro, wat et heescht, mat der eegener Trauer Suen ze verdéngen.

Wonnerschéin a lues entfale sech déi eenzel Schichten an de Lidder, zu kengem Moment kënnt op dësem Album Hektik op. Déi jazzeg Arrangementer sinn extreem lëfteg, dacks héiert een niewent de Vocals just dee waarme Moog Mother Sequencer, deen hei haaptsächlech zum Asaz komm ass. Ganz am Zentrum steet ëmmer der Ramona Gonzalez hir Stëmm, déi trotz hirer Prominenz wäit vir am Mix ni opdränglech gëtt. Hei an do kënnt et zu erfrëschend ongewéinleche Momenter, déi erkenne loossen, wéi d'Nite Jewel sech hir eegen Niche am Popzirkus erausschnitzt.

Ëmmer nees fillt ee sech un déi grouss Popschnulzen aus de 90er erënnert, woubäi grouss Gesten an ofgedrosche Leidensdeklamatioune wäitflächeg ëmschëfft ginn. Ouni jeemools an de Pathos ofzerutschen, dokumentéiert den Album "No Sun" vum Nite Jewel de Wee duerch an net ronderëm eng méi schwiereg Phas am Liewen. Wat bleift ass een op dat Weesentlecht erofgestrëppten Album, dee virun allem duerch seng minimalistesch Eleganz hänkebleift.

An der Mediathéik:

Album vun der Woch / / Vicky Stoll
Lauschteren

Méi zum Thema

Claire Laffut
Claire Laffut - Bleu

D'Claire Laffut huet hiren Debutalbum erausbruecht. "Bleu" geet vun Indie bis Dance-Pop, mat Perkussiounselementer a kloer feministeschen Aussoen an ass eng Rees duerch d'Karriär vun der Musekerin.

e37.jpg
Sample vun der Woch

1979 ass d'Lidd "A Few More Kisses To Go" vum Isaac Hayes erauskomm. De Multi-Instrumentalist an Autodidakt hat zu där Zäit e kreative Leerlauf - dat hënnert hien awer net drun, e grousse Succès an der Hip-Hop Communautéit ze hunn.

Net verpassen

  • Offre d'emploi: Journaliste-présentateur/trice

    radio 100,7

    L'Établissement de Radiodiffusion Socioculturelle, opérateur de la radio de service public radio 100,7, recherche Un/e Journaliste-présentateur/trice sous contrat à durée indéterminée et à tâche complète (40h/semaine).

Programm

Dossieren

  • Olympesch Spiller 2021

    D'Olympesch Spiller fannen, mat enger Joer Verspéidung, tëscht dem 23. Juni bis den 8. August zu Tokyo statt. Fir eis op der Plaz ass eise Korrespondent Philip Crowther.

  • Déi national Anti-Krise-Pläng an der EU

    Wat maachen d'Länner mat den Suen, déi hinnen aus dem Europäeschen Fonds de Relance zoustinn? An eiser Rubrik Europa Aktuell huele mer déi national Pläng ënner d'Lupe.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen