Nei Rubrik a Resonanzen Musek fir ze deelen
Fënnef MusekerInnen deele mat eis hir Musek. Am Kader vun der Emissioun Resonanzen presentéiere si Stécker, déi si am Kader vun der COVID-19-Pandemie gäre mat hire Matmënsche géifen deelen.
"Ech sinn den/d' ... an ech wëll d'Stéck ... mat Iech deelen." Musek huet net nëmmen d'Kraaft, Leit zesummenzebréngen, mee se huet och fir ee selwer eng ganz perséinlech Bedeitung. De radio 100,7 proposéiert dofir Musekerinnen a Museker eng Plattform, fir e Stéck ze presentéieren, dat si am Kader vun der COVID-19-Pandemie gäre mat hire Matmënsche géifen deelen. Déi nei Rubrik leeft am Kader vun der Emissioun Resonanzen.
Danielle Roster
D'Danielle Roster ass Musekologin a schafft fir de CID-Fraen an Gender. Si deelt gären der Rebecca Clarke hire Pianotrio, well d'Komponistin engersäits nach zimmlech onbekannt ass a well hiert d'Stéck op déi aktuell Situatioun passt.
Jean-Claude Braun
Der schwedescher Kultband ABBA hir Musek ass nach ëmmer ganz populär, sécher och duerch de Musical "Mamma Mia". Arrangementer fir Orchester vun de schéinste Melodië vun der Pop-Grupp ginn et der vill. Den Dirigent vun der Militärmusek, de Majouer Jean-Claude Braun, verbënnt domat e flott berufflecht Erliefnes: e grousse Concert um Parvis vum Neimënster mat enger flotter Beliichtung an der herrlecher natierlecher Fielskuliss.
Anne Galowich
Mam Stéck "Les idées heureuses" aus dem François Couperin senge Pièces de clavecin verbënnt d'Anne Galowich eng ganz besonnesch Erënnerung aus hirer Jugend. Gläichzäiteg ass et e Stéck, dat d'Cembalistin eréischt méi spéit deite konnt. Si erkläert dës Bedeitung an deelt gläichzäiteg och hir ganz perséinlech Idées heureuses.
Carlo Jans
Grënner a Chef vum internationale Forum fir Flütt a Piano zu Dikrech, Doctor in Arts vun der Akademie zu Lodz, Dirigent a Professer fir Flütt am Stater Conservatoire - de Carlo Jans ass e villsäitege Museker, dee seng Leidenschaft an dësen aussergewéinlechen Zäiten och mat eisen Nolauschterer wëllt deelen an hinne Freed a Courage maachen.
Sabine Weyer
D'Sabine Weyer ass Pianistin a schafft als Professorin um Stater Conservatoire. Si deelt gären d'Kantat "Gottes Zeit ist die alleberste Zeit" vum Johann Sebastian Bach.
Méi zum Thema
Crazy Quarantine Sessions: Kollaboratioun a Qualitéit héichhalen
Bei de Crazy Quarantine Sessions diffuséiere Museker vun doheem aus Concerten iwwer den Internet. D'Musek gëtt ënner beschtméigleche Konditiounen opgeholl a gemixt. Elo och um Radio ze genéissen.
André Jolivet rebelote
Eng Intégrale mat der Musek vun engem Komponist, dee selwer net Flüttist war, fir d'Instrument awer eng Sympathie hat, dat huet d'Hélène Boulègue gereizt. Elo huet si den zweeten Album publizéiert.
