Neien Album vun The Notwist Musek fir dronkeg Deeg

No 30 Joer Karriär maachen The Notwist ee vun hire stäerksten Albumen. "Vertigo Days" ass eng poetesch Ausenanersetzung mat der Realitéit. D'Museker verschaffen Isolatioun, Pandemie an Nationalismus zu engem positive Gesamtkonschtwierk. Et ass eng Invitatioun fir vun enger besserer Welt ze dreemen.

Yves Stephany

The Notwist
The Notwist (Foto: Gerald von Foris)

Siwe Joer ass et hir, datt de leschten Album "Close To The Glass" vun The Notwist erauskoum. Awer déi dräi Bandmemberen waren an der Tëschenzäit bei anere Projeten aktiv, hu mat ganz ënnerschiddleche Musekerinnen a Museker kollaboréiert, a virun allem hu si op Soundtracke geschafft.

Dat héiert een um neien Album: en huet eng staark cinematographesch Komponent, et ass een duerchgoende musikaleschen Trip, béi deem d'Lidder fléissend aneneen iwwerginn. An et gëtt vill Fudder fir de Kappkino.

Wat den Album auszeechent, ass säin immense Räichtum. Et gi Momenter, déi un The Notwist aus de fréien 2000er erënneren. Dann, wann dem Markus Acher seng Stëmm mat agebauter Melancholie zu Lagerfeier-Gittar an dezenten elektronesche Beats séngt. Et ginn awer och Momenter, déi vill méi experimentell sinn, wou Krautrock a Minimal Music den Toun uginn

Kee Patchwork

Ausserdeem hunn déi dräi Museker eng ganz Rëtsch Invitéen derbäi, vun der japanescher Sängerin Saya bis bei déi amerikanesch Jazz-Musekerin Angel Bat, och dat suergt fir eng ganz breet musikalesch Palett.

Anescht wéi ee kéint fäerten, ginn déi vill verschidden Aflëss net op d'Käschte vun der Koherenz. Vertigo Days ass e ronnt Gesamtkonschtwierk ginn. Et wierkt zu kengem Moment wéi e Patchwork, mee et gëtt een als Nolauschterer duerch eng spannend musikalesch Rees geleet.

Kloer, et ass eng Achterbunn vun de Gefiller, et kënnt een op Plazen, déi net ëmmer einfach ze verdaue sinn, mee et gëtt een dofir ëmmer nees mat wonnerschéine Momenter belount. Dissonanze sinn eng wichteg Komponent an der Musek vun The Notwist, et deet awer zu kengem Moment wéi.

Wéi zum Beispill bei "Oh sweet fire", wou den amerikanesche Museker "Ben LaMar Gay iwwer eng Verléifte Koppel séngt, déi bei enger Demonstratioun mat marschéiert.

E politeschen Album

Net nëmmen do gëtt déi politesch Komponent vu Vertigo Days däitlech. De Fait, datt déi dräi Bayern hire Projet opmaache fir Invitéen aus aller Welt ass en Appell fir Statement. De Markus Acher seet, datt politesch a gesellschaftlech Entwécklungen, déi wärend dem kreative Prozess geschitt sinn, e groussen Afloss op den Album haten. "Alles gëtt ëmmer méi konservativ an nationalistesch. Iwwerall" - seet hien dem ARD-Magazin TTT.

Vertigo Days reflektéiert déi global Onsécherheeten, déi mir am Moment erliewen. Duerch d'Pandemie kritt et natierlech nach eng zousätzlech Drénglechkeet. Op eemol geschéie Saachen, déi een ni fir méiglech gehalen hätt. Op eemol ass näischt méi kloer... Awer et geléngt de Museker, dat op eng ganz poetesch a positiv Manéier ze verschaffen. Den Album feiert d'Léift an den Zesummenhalt, a weist Perspektiven aus der Isolatioun.

"Vertigo Days" ass eng vun de beschten Aarbechte vun The Notwist. Ech hätt net geduecht, datt si no 30 Joer Band-Karriär nach eng Kéier sou e staarken Album géifen ofliwweren. Am beschte lauschtert d'Wierk sech am ganzen, et sollt ee sech déi néideg Zäit huelen dofir.

An der Mediathéik:

Album vun der Woch / / Yves Stephany
Lauschteren

Méi zum Thema

Buck Meek
Album vun der Woch

Dem Buck Meek seng nei Scheif "Two Saviors" gouf am déiwen dompege Summer zu New Orleans iwwer siwen Deeg opgeholl. De Gittarist bei Big Thief huet op Dynamik, Improvisatioun an Imperfektioun gesat.

Faux Real
Eurosonic 2021

Faux Real - dat sinn di franséisch-amerikanesch Gebridder Arndt, déi mat vill Ironie, Dadaismus a Glam zesummen optrieden. Um Eurosonic hu se mat hirer eegener Mise-en-scène schmunzelen an danze gedo.

Caspar Clausen
Caspar Clausen - Better Way

Mat "Better Way" presentéiert den Efterklang a Liima-Frontmann Casper Clausen säi Solodebut. Den Album ass eng rasant Achterbunn tëschent energescher Extas an déifster Melancholie.

Hannah Ida
East of Eden feat. Florian Van Kooy

An hirer neier Single "East of Eden" verbënnt d'Hannah Ida ee Sample Beat mat einfache Gittars-, Pianos- a Synthesizerlinnen zu engem lëftege Ganzen. De Song handelt iwwer Relatiounen an hirer ganzer Diversitéit.

Programm

Net verpassen

Dossieren

  • Déi eeleft Editioun vum LuxFilmFest

    Trotz Pandemie gëtt de Luxembourg City Filmfestival organiséiert. Déi 11. Editioun (4.-14. Mäerz) kritt dëst Joer awer eng liicht aner Nues: Filmer ginn deels am Kino deels online gewisen.

  • Drogen a Mënschen

    Zanterdeem et d'Mënschheet gëtt, hunn Droge si begleet. Haut hu vill Drogen e schlechte Ruff. Wisou ass dat esou a wat misst geschéien, fir besser iwwer eventuell Risike beim Konsum opzeklären?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen