Radioen

On air

De Moien  |  Brooke Combe - Impress You

play_arrow Live
arrow_back_ios

article

article

/ klein. - akustesch an elektronesch

Neie musikalesche Projet

klein. - akustesch an elektronesch

De Jérôme Klein ass ee vun deene villsäitegste Museker zu Lëtzebuerg. Elo lancéiert hien deen éischte Projet, wou seng eege Musek am Mëttelpunkt steet. Hie gëtt vu bekannte Gesiichter encadréiert.

auto_stories

2 min

An der Lëtzebuerger Musekszeen kënnt ee kaum laanscht de Jérôme Klein. Hien ass Pianist, Batteur a Vibraphonist. Ënner anerem spillt hie bei Pol Belardi's Force, Urban Voyage, Napoleon Gold, Maxime Bender Universal Sky, Fox oder Metromara. "Et ass Stress, mä ech maachen dat gär. Vläicht brauch ech och dee Stress", laacht de Jérôme Klein.

klein. ass deen éischte Projet, wou hien de Mastermind ass, wou seng Kompositiounen am Mëttelpunkt stinn. "Do presentéieren ech dat, wat ech fillen a wëll weisen. Et ass ee Mix vu ville Saachen, déi ech scho gemaach hunn. Ech spille jo och Electro, Jazz a Rock. Et ass vläicht eng Synthèse vun deem Ganzen. Awer och zimlech minimalistesch. Et ass eng ganz Ambiance."

Mat am Trio sinn de Pol Belardi an den Niels Engel, mat deenen de Jérôme Klein och an anere Projeten aktiv ass. Hie géif si ebe gutt kennen a wéisst a wéi eng Richtung et mat hinne géif goen. Ufanks hätt hie bei dësem Projet wéilte Batterie spillen, mëttlerweil wier hien awer bei den Tasten ukomm. "Ech probéieren dat Akustescht mat deem Elektroneschen zesummeschmëlzen ze loossen."

klein. huet eng Artiste-Residenz am Kader vum Festival Like A Jazz Machine. Dat hätt et erlaabt, de Projet ënner professionelle Bedingunge wuessen ze loossen, seet de Jérôme Klein. Hien hätt vill Energie dragestach a géif hoffen, datt d'Band och nom Festival géif weider existéieren. Och iwwer een Album géif een nodenken.

De 25. Mee kann ee klein. zu Diddeleng erliewen.