"Ech spillen net ëmmer mat Batteur, mee haut schonn" esou den Eric Junker iwwer säi Projet, deen op maximal Flexibilitéit ausgeluecht ass. Als elektroneschen Ein-Mann-Orchester, ob mat Batteur oder ouni, muss ee sech gutt aussichen, wéi eng Elementer als Samples (an am Viraus opgeholl) an d'Musek eragestart ginn, a wéi eng selwer "vun Hand" bäifüügt ginn. Dat gëllt och fir den elektresche Bass, dem Slumbergaze säin Haaptinstrument, dee mol live, mol aus de Maschinnen töine kann.
"Haut den Owend spillen ech en net, ech géif mech gären op déi elektronesch Elementer konzentréieren."
Musek ass also Fräiheet, déi an dësem Fall de Maschinnen an hire strenge Reegelen ofgeronge gëtt. Beim Komponéieren ass et ganz änlech. Eng Hellewull Gedanken a Gefiller fonken dem Museker gläichzäiteg duerch de Kapp, Kadenzen, Texturen, déi am Endresultat erhale bleiwe sollen. "Wann ech komponéiere well ech genee dat komponéieren, wat ech denken. Ob dat an engem konventionelle Sënn bei enee passt, ass mir manner wichteg. Ech setze mir do keng Grenzen, ech wëll genee maachen, wat ech wëll, a loossen allem fräie Laf."
Lauschtert dem Slumbergaze seng Session live um 20 Auer op eiser Antenn (4.8.2020) an natierlech duerno an eiser Mediathéik.