Album vun der Woch Gangster-Rapperin a Feuilleton-Darling: geet dat?

Der Haiyti hire kommerzielle Flopp gëtt zanter Wochen am däitsche Feuilleton gefeiert. Op "Influencer", dem zweeten Album bannent sechs Méint, verstréckt sech d'Rapperin Haiyti genësserlech an all méiglech Widderspréch. Um Enn muss si feststellen, datt Fame an Usproch net esou liicht ze vereene sinn. "Influencer" vun der Haiyti ass eisen Album vun der Woch.

Vicky Stoll / tt

Rapperin Haiyti
picture alliance / Photoshot

Déi gebierteg Hamburger Rapperin Ronja Zschoche alias Haiyti gëllt scho vill ze laang als Geheimtipp.

"Influencerin" ouni kommerziell Unerkennung

Trotz enger reegelrechter Verëffentlechungsmanie kritt si de kënschtlereschen Usproch u sech selwer net a kommerzielle Succès ëmgewandelt. Dräizéng EPs, Mixtapes an Albumen a manner wéi véier Joer si Preuven dofir, datt qualitativ héichwäerteg an eegewëlleg Musek trotzdeem um kommerzielle Niveau floppe kann. Dat ass just ee vun de Widderspréch, un deenen déi nei Plack "Influencer" inspiréiert ass.

Ganz ironesch geet d'Haiyti mat hirer Enttäuschung iwwer deen ëmmer nach ausbliwwene kommerzielle Succès ëm.

Milieue vereenen

Den Track "zu real" zitt ee séiere Fazit: héchstwarscheinlech steet paradoxerweis ausgerechent d'Realness, also d'Authentizitéit, hir am Wee. D'Haiyti ass als Immigrantekand mat senger Mamm an einfache Verhältnesser opgewuess. Scho fréi huet si hir kreativ Energie gespuert an no der Schoul ugefaange Konscht ze studéieren.

Wa si am Track "sweet" behaapt, si hätt méi "Drip" wéi den Jackson Pollock, da bestitt si zwee Milieuen, déi per Definitioun onvereenbar sinn: et geet ëm d'Ästheetik am Gangster-Rap an an der Bourgeoisie.

Wärend si sech selwer domat maximal trei ass, leit gläichzäiteg hir "street cred", hir Glafwierdegkeet am Hip-Hop. Dobäi gesäit si sech selwer als Influencerin a spiert, datt si an der Zeen lénks a riets kopéiert gëtt, ouni awer déi verdéngten Unerkennung ze kréien.

E Spill mat de Widderspréch

Genee wéi Markebewosstsinn ass och Drogekonsum ee wichtegen Topos an dësem Genre vu Musek a spillt och bei der Haiyti eng Roll. Wärend déi fir den Trap a Cloud Rap typesch Substanzen zwar a bal all Track genannt ginn, kann een net méi vu Verherrlechung schwätzen.

Villméi entsteet den Androck, datt d'Haiyti hir Widderspréchlechkeet an hiren explosiven Eklektizismus net anescht ze domestikéiere weess, wéi duerch Betäubung. Si ass depressiv, mee si geet feieren. Si rappt vun Designerkleeder, déi si sech net leeschte kann. Si disst aner Rapper a kämpft gläichzäiteg ëm Unerkennung an der Zeen. Si ass verléift, mee si mécht Schluss.

Musekszeen entlarvt

Den Haaptmerite vun der Haiyti ass nieft hirem Talent am Ëmgang mat der Sprooch an hire Klischeeën och de Fait, datt si déi komplett Musekszeen entlarvt, an domat och sech selwer. An engem Tweet vum 8. Dezember schreift si: "Trëppel no uewen a schläim no ënnen - esou gëss du zum Influencer".

Mee sech ubiederen oder schläimen, egal bei wiem, dat kënnt fir d'Haiyti net a Fro. Den Album "Influencer" ass eng batter a gläichzäiteg genial Ofrechnung mat enger Zeen, an där d'Pose méi wichteg ginn ass wéi d'Realness.

An der Mediathéik:

Album vun der Woch / / Vicky Stoll
Lauschteren

Méi zum Thema

e16.jpg
Sample vun der Woch

1982 koum "I Keep Forgetting" vum Michael McDonald eraus. Eng Melodie, déi een och bei anere Lidder erëmfënnt. De Bobby Bieles ass Sample-Detektiv an erzielt d'Geschicht vum Lidd.

Chapters of Zdenka
Salami Rose Joe Louis - Chapters of Zdenka

Als Making Of vun hirem Debut-Album, deen d'lescht Joer erauskoum, ass "Chapters of Zdenka" wéi eng Visitt an der Salami Rose Joe Louis hirem Gerëmpels-Eck. De Marc Clement hëlt mat op Besuch, an eisem Album vun der Woch.

Programm

Net verpassen

Dossieren

  • CinEast-Festival 2020

    De CinEast-Festival weist eng Selektioun vu mëttel- an osteuropäesche Filmer. Déi 13. Editioun ass wéinst der Covid-Pandemie eng hybrid: d'Filmer gi souwuel um groussen Ecran wéi och online gewisen.

  • AutorInne-Lies

    D'Publikatioun PM 19 10 huet d'Valerija Berdi inspiréiert fir déi akustesch Athmospär fir d'Buch ze liwweren. Hatt huet sech dofir op de Wee gemaacht an eng ganz Rei Andréck bei Autorinnen an Auteuren doheem akustesch agefaangen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen