Déi nei Plack vun Chapters of Zdenka kann een als eng Art Making Of vun der Bay-Area Ex-Wëssnschaftlerin hirem Debut-Album "Zdenka 2080" gesinn. Et war ee komplexen a konzeptionellen Album, deen tëschent Dream-Pop an Jazz eng dystopesch Visioun vum Joer 2080 gezeechent huet, wou d'Welt vu groussen Entreprisë geleet gëtt. D'Plack ass nëmmen ze recommandéieren, sécherlech eppes, wat een als Wild Ride bezeechne kann.
De Plackelabel leet perséinlech Wierder vun der (mam biergelechen Numm) Lindsay Olsen Kënschtlerin weider. Déi éischt Hallschent vun der Plack wiere Songs, déi si als eng Aart Therapie geschriwwen hätt, an déi Entréeën an engem Journal gläichen. Vun der Angscht, de Verstand ze verléieren, erziele se a vum Duercherneen, deen am Kapp entseet, wann ee sech Fantasiereesen an Zukunftsvisioune ganz higëtt. Och de Wonsch, hir sozial Konditionéierung als Fra ofzeleeën, schwätzt aus der Salami Joe Rose Louis hirer iwwerdréiter Musek.
Fligeren déi starten, mee ni landen
Den Nolauschterer kann déi Songs, déi seele vill méi wéi zwou Minutten daueren, als Fligere gesinn, déi een nom anere starten, mee ni landen. Wéi Bréifdauwen oder Fläschepost verléiert sech all Ufank an enger verréckter Envolée. Dës Grondbeweegung no uewen hëlt enger potenziell melancholescher Sammlung vu Lidder hire Bass, an et rappt ee grouss d'Aen op bei deenen éischte Blécker an der Salami Rose hir Bannewelten.
Bedroom-Pop vun där intiimster Zort kann hei op eemol rhythmesch matrappen, wéi op "We're Dumb" oder "Cosmic Dawn", wärend der Songwriterin hir vill superposéiert Stëmmen ënner Landschafte mat grousser Komplexitéit ausmolen. An Terme vu Struktur ass hei alles labber, verwëscht a kuerzlieweg. Téin forme sech wéi Damp, krausele sech an der Loft an heemelen d'Oueren. Um Enn vun der Plack suergen e puer käreg Remixe fir eng aner Zort vun Niwwel an Iwwerschneidung: déi vun der Kollaboratioun. Si komme vun der Georgia Anne Muldrow a vum Dakim a sinn absolut top.
Eng Erfarung wäert
Et freet ee sech, ob "Chapters of Zdenka" wierklech gemaach ass, fir méi wéi eemol gelauschtert ze ginn, ob et net vläicht eng eemoleg Rees ass, vun där ee sech soll erféiere loossen, a se dann erëm vergiessen. Mee do ënnerschätzt een der Salami Rose hiert Kënnen. Dose vu Mini-Hooks, a fräier Form iwwer d'Plack verstreet, wuerme sech an d'Conscience a bréngen een zeréck. Esou sinn d'"Chapters of Zdenka" eng Iwwerraschung, op enger ganz onerwaarter Plaz, een onerwaarte Gaascht, dee mat engem komesche Cadeau kënnt. Loosst Iech d'Erfarung net entgoen.