Déi nei EP ass kéng, mat réien an dramatesche Kläng, ongewéinlech an iwwerraschende Wiessel. Klassik trëfft op Dubstep, Lounge Jazz op elektronesche Kaméidi. Et kéint ee mengen, datt Ongewëssheet ni Deel vum Kreatiounsprozess war, datt déi zwee Artisten ouni Angscht un d'Aarbecht erugaange sinn.
"Natierlech war den Zweiwel present, mir stellen eis konstant a Fro, mee op eng gesond a gutt Manéier", seet allerdéngs d'Georgia Ellery. Et wier een net direkt op déi fäerdeg Iddi gestouss, vill Ännerunge goufe gemaach.
Op alle Fall muss ee couragéis sinn fir mat engem experimentellen a fräie Geescht un d'Matière ze goen. Et hätt ee sech awer och Gedanke gemaach, ob ee plazeweis net ze wäit an den Extremer gaangen ass, wéi beim Lidd "Robert" zum Beispill.
Ob eppes schlussendlech Goût huet, wier dacks delikat ze bestëmmen, zemools wann ee sech op onbekanntem musikaleschen Terrain beweege géif. "Ech mengen mir si besser ginn am Bestëmmen, ob eppes mat Goût gemaach oder einfach nëmmen ze mierf ass. Dacks ass et e bësse vun deenen zwee", esou d'Georgia Ellery.
Tëschent réier Energie an Iwwerproduktioun
Jockstrap géif vill Zäit am Studio um Feischlëff verbréngen. "Ech mengen dat Instinktiivt passéiert op enger anerer Plaz. D'Georgia schreift d'Lidder zimmlech séier, mee wa mer zesumme kommen verbrénge mer vill Zäit mam Detail", esou den Taylor Skye.
Um Enn iwwerwënnt Jockstrap de schmuele Grad tëscht réier Energie an Iwwerproduktioun. "Well eis Klangwelt eben esou ekstatesch, instinktiv a mëll ass, brauche mer de Feischlëff fir ebe grad déi eckeg Wiessel méi koherent ze maachen" esou, d'Georgia Ellery.
Sech mat Extremer beschäftegen
Hir Musek wier eben hyperaktiv an dat misst een e bëssen entschäerfen. "A bei der Aarbecht geckse mer awer och natierlech vun Zäit zu Zäit", laacht den Taylor Skye. Den Decisiounsprozess an deem déi zwee verwéckelt sinn, wier op alle Fall immens spannend. "Wann s de eng staark Iddi hues, so ni nee, sief oppen. Wann s de selwer net sécher bass, mee déi aner Persoun voll dohannert stécht, da muss de där einfach vertrauen", esou d'Georgia Ellery.
Op där Basis fonctionéiert Jockstrap. Mat der Zäit wiere si sech ëmmer méi instinktiv eens iwwer Iddien. De Fait Musek ze maachen, déi sech mat Extremer beschäftegt, wier einfach aus Spaass eraus entstanen. "Jockstrap ass einfach mir zwee déi zesummen eppes maachen" seet den Taylor Skye.