Klassik-CD vun der Woch Düster an nuancéiert

Dem Dmitri Schostakowitsch seng zwee Geieconcerti sti fir zwou decisiv Etappe vu sengem Liewen. De Concerto Nummer 1 schreift hien ënner der Stalin-Diktatur, ënner der stänneger Angscht, selwer Affer vum Regime ze ginn. Den zweete Concerto ass de leschte Solo-Concerto, deen de Schostakowitsch komponéiert. Den Ivan Pochekin huet elo béid Wierker nei opgeholl.

Luc Boentges

Dmitri Shostakovich

Dem Dmitri Schostakowitsch säin éischte Geieconcerto fänkt mat engem düsteren Unisono un. No dëser kuerzer Ausso an den déiwe Sträicher héiert een d'Gei mat hirem laangen, intensive Monolog. De Geiist Ivan Pochekin hëlt sech fir seng Interpretatioun vill Zäit. Hien deent d'Nouten, hält se duerch Spannung um Liewen a verzielt esou eng Geschicht. De Russian National Orchestra bleift dobäi ganz am Hannergrond an ënnerstëtzt de Monolog vum Geiist andeems e Stëmmungen ouni eegen Aussoen entstoe léisst.

Eng lieweg Interpretatioun

Anescht ass et am zweete Saz vum éischte Concerto. Net nëmmen trëtt den Orchester hei däitlech an den Dialog mat der Gei, mee en iwwerhëlt zum Deel seng Aussoen a féiert se weider. Wat virdrun en onendleche Monolog war, ass elo ee mat vill Energie interpretéierten Danz.

Säin zweete Concerto huet den Dmitri Schostakowitsch 1967 geschriwwen. Och dëst Wierk huet en düstere Grondcharakter, obwuel et an engem méi positive Kontext entstanen ass. De Schostakowitsch huet d'Wierk nämlech fir de 60. Gebuertsdag vum Geiist David Oistrach geschriwwen. An dat héiert ee virun allem am lieweg interpretéierten drëtte Saz eraus.

Vill Nuancen an der Dynamik

Alles an allem geléngt et dem Ivan Pochekin déi verschidde Stëmmunge vun a bannen de Concertoe mat senger Gei anzefänken, a se op Basis vun engem düstere Grondtoun ze variéieren. De Russian National Orchestra begleet hien dobäi ganz dynamesch, mat vill Nuancë souwuel an der Dynamik, wéi och am Charakter.

Méi zum Thema

Lucilin Japan
United Instruments of Lucilin

Den Ensembel fir zäitgenëssesch Musek United Instruments of Lucilin ass den Ament op enger Tournée duerch Japan. De Perkussionist Guy Frisch verréit seng Andréck nom éischte Concert.

Baiba Skride
Baiba Skride

D'Baiba Skride war an der Philharmonie fir den zweete Geieconcerto vum Sergei Prokofjew zesumme mam OPL ze interpretéieren. Am Interview schwätzt si iwwer d'Wierk, hir Concertsreesen an den Orchester.

Siren's Call 2020
Sirens Call

Haut huet den Atelier éischt Nimm vum Line-Up 2020 bekannt ginn. Headliner si Foals vun Oxford, déi schonn am Mee d'lescht Joer am Atelier gespillt haten an de Samschdeg 27. Juni en zweeten Ofstiecher op Lëtzebuerg maache kommen.

Ivan Boumans
International Classical Music Awards

Op Virschlag vum radio 100,7 a vu pizzicato.lu kritt den Ivan Boumans de Composer Award 2020. De Präis fir d'Liewenswierk geet dëst Joer un d'Pianistin Elisabeth Leonskaja.

Programm

Net verpassen

Dossieren

  • AutorInne-Lies

    D'Publikatioun PM 19 10 huet d'Valerija Berdi inspiréiert fir déi akustesch Athmospär fir d'Buch ze liwweren. Hatt huet sech dofir op de Wee gemaacht an eng ganz Rei Andréck bei Autorinnen an Auteuren doheem akustesch agefaangen.

  • #beethoven20

    De Jean Muller gëtt an 32 Episoden en déiwen Abléck an de Kosmos vum Ludwig van Beethoven senge Pianossonaten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen