SLOWTHAI Den "TYRON" ass zeréck

De brittesche Rapper Slowthai huet schonn 2019 mat sengem Debutalbum "Nothing's Great About Britain" kënnen iwwerzeegen. Am Februar huet den Englänner säin neien Album rausbruecht. Seng vulgär an awer poetesch Aart a Weis ze rappe kënnt awer net nëmmen an der UK gutt un.

Max Feyder / cbi

Slowthai
Foto: Crowns & Owls

De Rapper aus de Midlands huet mëttlerweil mat sengem Hip-Hop och an den USA Uklang fonnt. Dat ass keng Iwwerraschung, säi "Psycho" style ze flowen ass intensiv an extravagant. D'Lyrik, an d'Punk-Aflëss a senger Musek, hunn ënner anerem schonn dozou gefouert, datt hien als den neie "The Streets" betitelt gouf.

2020 hätt de Slowthai awer vill perséinlech Problemer gehat, sou de jonke Museker an engem Interview mat NME. Gehollef no vir ze kucken an erëm op d'Been ze kommen hätt him keen anere wéi de bekannte brittesche Rapper a Produzent Skepta. Deen ass awer net nëmmen ee gudde Mentor gewiescht, mee och ee vum Slowthai senge Gäscht um neien Album, um Lidd "Cancelled".

Méi perséinlech

Op dësem Duebelalbum weist de Slowthai sech méi perséinlech wéi bis elo. Dowéinst wuel och den Titel: Tyron, dem Slowthai säi biergerleche Virnumm. Hie schwätzt iwwer säi Banneliewen, seng eege Gedanken, säin Trotz a säi Bedaueren. Doduerch huet säi Rap u Maturitéit gewonnen, obwuel de Kënschtler seng speziell a kannereg Delivery bäibehält, .

Um neien Album si 14 Titelen, déi an zwou ganz ënnerschiddlech Hallschente strukturéiert sinn. Den coolen Iwwergang tëschent dësen zwee Albumdeeler mëscht d'Lidd siwe mat "Play With Fire".

De 26-Järege beweist mat sengem neiste Wierk awer net nëmmen Diversitéit, mee och säin staarke Wëllen. Trotz viller Kritik u senger ëffentlecher Persoun huet hien et gepackt, elo schonn ee vun deene faszinantste Rap-Albe vun dësem Joer eraus ze bréngen. D'Texter huet hien eleng am Lockdown geschriwwen. Dat beweist, datt hien trotz staarker Kritik an héijen Erwaardungen, net sou einfach kleng ze kréien ass.

Ee verréckt gudden Album

D'Gäscht um Album vum geckege Northamptoner schwätze fir sech: ASAP Rocky, Denzel Curry, Mount Kimbie, James Blake, Skepta, Dominic Finke an Deb Never sinn Deel vun "Tyron". Et kéint een Angscht kréien, datt de Slowthai bei sou vill Talent ronderëm sech géif ënner goen. Dat ass awer wierklech net de Fall.

D'Endresultat ass nämlech een authentesche Slowthai-Album, och wann et zu Schluss hi méi roueg a nodenklech gëtt, wéi gewinnt bei senger Musek. Menger Meenung no fënnt all Mënsch ee Bijou um Album.

De Kontrast vum verréckten, zum méi rationelle Slowthai gëtt mir perséinlech ni langweileg. Dowéinst ass Tyron eng grouss Recommandatioun/e Must/en Tip... fir jiddwereen, deen un zäitgenësseschem Rap interesséiert ass.

An der Mediathéik:

Album vun der Woch / /
Lauschteren

Méi zum Thema

Virginia Wing
Musek

Den Avantpop-Trio Virginia Wing presentéiert sech op "private LIFE" chaotesch a verspillt. Deen neien Album ass d'Resultat vun enger musikalescher Gruppentherapie a féiert déif eran an d'Séileliewe vun de Bandmemberen.

django django
Gelongen Evolutioun

Am Donkele liichten ass Hoffnung a schwieregen Zäiten. Aus Rave a Psychedelic Pop wiewen Django Django eng faszinéierend Tapéit, déi un een eidelen Dancefloor denken deet.

Programm

Net verpassen

  • Annonce: Recherche d'un chef de la programmation

    Gebai vum radio 100,7

    L'Etablissement de Radiodiffusion Socioculturelle, opérateur de la radio de service public radio 100,7, recherche 1 chef de la programmation (m/f) pour contrat à durée indéterminée et à temps plein.

Dossieren

  • Déi eeleft Editioun vum LuxFilmFest

    Trotz Pandemie gëtt de Luxembourg City Filmfestival organiséiert. Déi 11. Editioun (4.-14. Mäerz) kritt dëst Joer awer eng liicht aner Nues: Filmer ginn deels am Kino deels online gewisen.

  • Drogen a Mënschen

    Zanterdeem et d'Mënschheet gëtt, hunn Droge si begleet. Haut hu vill Drogen e schlechte Ruff. Wisou ass dat esou a wat misst geschéien, fir besser iwwer eventuell Risike beim Konsum opzeklären?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen