Eurosonic Déi beschte Momenter vum Festival

Gallowstreet
Brass-Afterparty mat Gallowstreet

Beim Eurosonic Festival triede ronn 350 Artisten op. D'Qualitéit ass variabel. Do kann ee séier den Iwwerbléck verléieren. Den Tom Dockal an den Yves Stephany hu vill Concerte gesinn. Hei sinn déi wichtegst Nimm, déi ee sollt behalen.

Donneschdeg

Birthh

Fragil an transparent ass den Elektro Pop vum Trio aus Italien. Hir Kompositioune wierken zum Deel wéi Brouillonen, déi riskéieren an ee Koup ze falen, wa weider Elementer géifen dobäi kommen. D'Referenzen un "The xx" ginn net verstoppt. Awer der Sängerin Alice Bisi hir zart Stëmm, déi enorm Taktsécherheet vum Batteur an dem Gittarist a Produzent seng zeréckhalend Approche loossen een déi séier vergiessen.


Yes I'm Very Tired Now

De Quartett ronderëm de Schwäizer Sänger Marc Frischknecht mécht ee Pop, dee sech u Post Punk an New Wave inspiréiert. Handgemaache Grooves, rockeg Passagen an Hooklines wiessele sech of. Reng optesch si Yes I'm Very Tired Now keng Band, déi besonnesch erausstécht. Virun allem, wann d'Beliichtung am Club sou ongënschteg ass, déi am "Spiegel".


Jacques

Dee franséische Museker ass dee sympatheschsten Act vum Festival. Ouni Stress mixt de Jacques de Klang vun Objeten aus dem Alldag mat einfache Beats a minimalistesche Synhtesizer-Melodien. Säin organesche Lo-Fi Techno äifert kenge Klischeeën no. Genee wéi dem Museker seng Frisur ass seng Musek ee Statement vun der Kompromësslosegkeet. De Concert war en engem spektakuläre Planetarium, allerdéngs hätt ee klengen, verschweesstene Keller op d'mannst genee sou gutt funktionéiert.


Holy Nothing

Dee portugiseschen Trio mécht Elektro-Pop, deen net pretentiéis ass. Am Plaz vun engem Laptop schaffe si mat engem bëllegen, klenge Sequencer. Hinne geet et méi ëm de physeschen Akt vum Spillen, wéi ëm eng perfekt Show. Si loosse Feeler zou, wat hir Musek fir de Public méi spannend mécht. Mention speciale fir de Bassist!


Mëttwoch

Anna Meredith

Maximalistesch, repetitiv an iwwerlueden: D'Kompositioune vun där jonker britescher Musekerin Anna Meredith si keen einfache Kascht. Trotzdem ass hir Musek op eng komesch Art a Weis accessibel. Refraine fir mat ze sangen a Pop-Momenter briechen déi éiweg Crescendoen, déi net seelen un de Philip Glass erënneren. Op der Bühn wuessen hir Laptop-Kompositioune mat Tuba, Cello, Batterie a Gittar zu nach méi bombastesche Kaméidi-Orgien.


Teksti-TV 666

Sechs Gittaren op der Bühn kéint Duerchernee bedeiten. Déi finnesch Band Teksti-TV 666 bréngt et fäerdeg eng geuerdent Anarchie z'inszenéieren. Hiren dreckege Rock'n'Roll ass wéi eng agreabel Infektioun, déi ee soubal net méi aus dem Ouer lassgëtt. Teksti 666 kritt den 100,7-Spaass-Award vum Eurosonic 2017.


Tommy Cash

De Rapper aus Estland jongléiert mat Klischeeën: Der Boma hire Rack aus Russland trëfft op britesch Trap-Sounds. Gender, Drogen, Suen, den Tommy Cash geheit alles an een Dëppen a kacht eng Zëppchen, déi gutt erageet. Vu senger Live-Performance hätte mir eis méi Edge erwaart. An och d'Beats missten op de Leescht geholl ginn: Der Produktioun feelt et (nach) un Drock a Kohärenz.


Gurr

Zwou Frënndinne vu Berlin spille Rock. Kléngt einfach, ass et och. Efficace arrangéiert a mat vill Charme interpretéiert. Virun allem d'Gittare vu Gurr hunn eis et ugedoen. De Sound ass gläichzäiteg schaarf, wéi zu Manchester a waarm, wéi a Kalifornien. Dësen Numm wäerte mir an Zukunft méi dacks héieren. Och zu Lëtzebuerg ass ganz geschwënn ee Concert.

An der Mediathéik:

Kultur / / Yves Stephany Tom Dockal
Lauschteren

Méi zum Thema

Cleveland
Elektronesch Musek

Hie verëffentlecht op renomméierte Labelen a spillt a bekannte Cluben. Elo cibléiert hien déi grouss europäesch Festivalen. De Produzent Cleveland vertrëtt Lëtzebuerg beim Eurosonic. Ee Gespréich.

Antifragile
Post Rock

Zënter iwwer zwee Joer maache si sech een Numm op de Lëtzebuerger Bühnen. Elo kënnt endlech den Debut-EP vun Antifragile eraus. Dee markéiert schonn nees den Ufank vun enger neier Schafensperiod.

Jess Williamson
Americana

"Heart Song" ass der Jess Williamson hiren zweete Long-Player. Dës intimistesch Plack verklanglecht déi texanesch Wüstelandschaft. Als Nolauschterer riskéiert een d'Orientéierung ze verléieren.

Edsun
Rock a Pop zu Lëtzebuerg

2016 war ee spannend Joer fir d'Musek zu Lëtzebuerg. Am Schied vum Grammy si vill pertinent Produktiounen entstanen, et hu sech nei Talenter op d'Bühn gewot, an et gouf iwwerraschend Reformatiounen.

Net verpassen

  • Offre d'emploi: Redakter/Redactrice Web

    radio 100,7

    Den Média de service public 100,7, deen de radio 100,7 bedreift, sicht en/eng neie/nei Redakter/Redactrice fir d'Onlineredaktioun mat engem Aarbechtskontrakt op onbestëmmten Dauer (CDI) fir 40 Stonnen d'Woch.

Programm

Dossieren

  • Chamberwalen 2023

    Am November gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen