The Wants - Container D'Sich no der Plaz an der Gesellschaft

The Wants ass en neien Trio vu Brooklyn, dee mat senger Fusioun aus Post Punk an Detroit Techno genee den Nerv vun der Zäit trëfft. E Freideg koum hiren Debutalbum "Container" eraus. E besseren Zäitpunkt fir d'Verëffentlechung hätt et kaum kéinte ginn, fënnt den Yves Stephany, deen dës bësseg Gesellschaftskritik als Album der Woch proposéiert.

Yves Stephany / cbi

The Wants
Foto: Council Records

Um Cover vum Wants-Album si Konservebéchsen. Datt dësen dystopeschen Album op deem Dag erauskënnt, wou d'Police muss intervenéieren, well Mënschen an de Supermarchéë wéinst Konserven unenee geroden, ass eng tragesch Ironie.

D'Musek op Container ass de Soundtrack fir dës politesch, ekonomesch a gesellschaftlech verréckten Zäit, déi grad nach e bësse méi verréckt gëtt. Am Mëttelpunkt vum Madison Velding-VanDam sengen Texter steet den Individuum, an d'Sich no senger Plaz an der Gesellschaft.

D'Musek vun The Wants ass, am Géigesaz zu der Situatioun, déi vun hinne beschriwwe gëtt, alles anescht wéi chaotesch. De Kader ass eng klassesch Trio-Formatioun mat Post-Punk Instrumentéierung. D'Rhythmik vu Batterie, Bass a Gittar ass extrem prezis an eckeg. Déi maschinell an düster Grondstëmmung gëtt vun dezente Synthesizeren atmosphäresch verstäerkt.

Ee subtillen Afloss vun Detroit Techno

Den Trio gëtt den Anthony Shakir an den John Beltran als Inspiratiounsquelle fir déi elektronesch Säit vun hirer Musek un. Déi gehéieren allebéid zu der Pionéiergeneratioun vu Produzenten, déi an den 90er Jore vun Detroit aus Techno als Konschtform etabléiert hunn.

De subtillen Afloss vun Detroit Techno kënnt net just an de ganz reusséierten, instrumentalen Interluden zum Droen, mee zitt sech wéi e roude Fuedem duerch den Debut vun The Wants. Et geléngt dem Trio, fir déi zwou Welte vu Post Punk an Techno sou mateneen ze verschmëlzen, datt d'Resultat méi ass wéi d'Zomm vun den eenzelen Ingredienten. Et ass en total stëmmegt an originellt Gesamtkonschtwierk mat enger Koherenz, wéi ee se net dacks fënnt.

Et gëtt Hoffnung a Schéinheet

Fir de Kontext ass et vläicht relevant ze soen, datt de Sänger a Gittarist Madison Velding-VanDam an d'Bassistin Heather Elle och Membere vun der gefeierter New Yorker Art Rock Band Bodega sinn. The Wants verdéngen et nach méi gefeiert ze ginn.

D'Zäiten iwwer déi si sange si verréckt a schwiereg, awer si maachen et mat sou enger Eleganz a Stilsécherheet, datt een trotzdeem danzt. Trotz aller Dystopie gëtt et Schéinheet an Hoffnung - och heiranner spigelt sech den Esprit vun Detroit erëm.


An der Mediathéik:

Album vun der Woch / / Yves Stephany
Lauschteren

Méi zum Thema

Christophe Chassol
Christophe Chassol - Ludi

Anescht, komesch, ureg, weird. "Ludi", den neien Disk vum Christophe Chassol, ass e richtegen Héichpunkt vum nach fréie musikalesche Joer. Musek, déi een och beim Vëlofuere lauschtere kann.

C'est Karma
Neie Song vu C’est Karma

Den alldeegleche Sexismus an de Paternalismus kritiséiert C'est Karma an hirem neie Lidd "Girls". Frae géif dacks net souvill zougetraut gi wéi Männer, a si wieren op ville Plazen ënnerrepresentéiert.

Riicht Eraus
Riicht Eraus

Musek faszinéiert Jongen a Meedercher am selwechte Mooss. An der Museksausbildung si béid Geschlechter gläich vertrueden. Et wielen awer vill méi Männer e Beruff an der Musek wéi Fraen.

King Krule
King Krule - Man Alive

"Man Alive!" ass Stroossepoesie vun bal Dickensianescher Zort, eng Aart Toundokument a Stëmmungen an Nuancen, eng Graphic Novel, déi ee vläicht e bësse wéi eng Jazzplack kéint lauschteren, fënnt de Marc Clement.

 

Programm

  • Noriichten

  • On air

    Resonanzen

  • Am Nomëtteg vun 3 bis 6

  • Panorama

  • Tockcity

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen