Allegra Krieger - The Joys of Forgetting D'Freed um Vergiessen

"The Joys of Forgetting" heescht der Allegra Krieger hiren Debut. Déi amerikanesch Singer-Songwriterin verschafft d'Iddi, datt d'Vergiessen heiansdo eng gutt Saach ka sinn.

Jamie Reinert / cbi

Allegra Krieger
Spiritualitéit huet e grousse Stellewäert an der Allegra Krieger hirer Musek. Foto: Liz Maney

D'Allegra Krieger ass trotz hirem jonken Alter scho vill uechter d'USA gereest. An engem Motel am Death Valley huet si als Haushälterin geschafft. Am Georgia huet si Beem geplanzt, heescht et am Pressecommuniqué.

Eng Transitioun an eng nei Liewensphas

Ursprénglech aus dem Florida ass si elo zu New York. "The Joys of Forgetting" hält eng Transitiounsperiod an eng nei Liewensphas fest, wou d'Vergiesse souzesoen eng karthagesch Roll ka spillen.

D'Lidder hu sech iwwer déi lescht Jore geformt, wärend Concerte weiderentwéckelt, bis se virun e puer Méint eenheetlech dokumentéiert goufen.

D'Performance op der Bün spieren

Bei Liveoptrëtter géif ee mierken, wéi eng Lidder am beschte funktionéieren, zielt d'Sängerin. Si mécht dat dorunner fest, wéi d'Publikum reagéiert oder wéi d'Performance vum Stéck sech ufillt. Den Album wier eng Kollektioun vun deene Lidder, déi sech live am beschten ugespuert hunn.

Live ass d'Allegra Krieger meeschtens als Quartett ënnerwee. Op hirem Debut sinn allerdéngs sëlleg aner Museker nach ze héieren. E Sträichsextett verleet Stécker wéi "Welcome" oder "I'm Gonna Drive" eng besonnesch Dynamik.

Vun den Arrangementer hier gouf sech un d'Aarbecht vun der Judee Sill inspiréiert. Eng tragesch kalifornesch Folk-Musekerin, déi 1979 un enger Iwwerdosis gestuerwen ass.

De reliéisen Afloss

A béide Musekerinnen hire Wierker a Liewen ass och eng staark reliéis Komponent bemierkbar. Der Judee Sill hir Musek ass spirituell a mystesch an d'Allegra Krieger ass an enger staark reliéiser Famill opgewuess. D'Musek hätt am Laf vun der Zäit d'Roll vum Glawen an hirem Liewen ugeholl, zielt d'Allegra Krieger.

"Si huet d'Katharsis ersat, déi vum Vertrauen a Gott kënnt. Gleeweg sinn, an d'Kierch goen, d'Gefill, datt ee seng Laascht erop an den Himmel ka setzen. Schreiwen ass op eemol souzesoe ganz reliéis ginn. Live spillen, dee Moment wierklech an der Musek ze sinn, huet sech fir mech och iergendwéi helleg ugespuert."

Hir reliéis Erzéiung géif sech och ëmmer méi an hiren Texter bemierkbar maachen, seet d'Allegra Krieger. D'Spiritualitéit an der Routine, an hire Bezéiungen an Observatiounen zum Beispill. Anescht wéi d'Judee Sill bleift si an hiren Texter allerdéngs direkt.

Komplex Emotiounen

Aktuell schafft d'Musekerin un engem neie Wierk. Déi zwee Féiss bleiwe weiderhin nach iergendwéi um Buedem. An hirem neien Album fokusséiert d'Spiritualitéit sech op dat alldeeglecht Liewen als Mënsch, zielt d'Allegra Krieger.

"All déi banal Saachen, déi mer musse maache fir ze iwwerliewen, iwwerdeems d'Klimakris sech weiderentwéckelt. Et gëtt souvill Onrou, et ass alles zimmlech komplex a mer fillen all komplex Emotiounen."

An hirem nächsten Album géif et drëms goen, wéi si dat alles spiert, zielt d'Allegra Krieger.


An der Mediathéik:

Kultur / / Jamie Reinert
Lauschteren

Méi zum Thema

Eddie Chacon
Eddie Chacon

Mat 56 Joer e Comeback ze feiere wier net einfach gewiescht. Den 90er Soul-Crooner ass no sëllege Joren nees am Studio. Den Eddie Chacon gëtt en Abléck an d'Produktioun vu "Pleasure, Joy and Happiness".

Thanya Iyere (Foto: Sophie Grouev)
Thanya Iyer - KIND

Déi süd-indesch Kanadierin Thany Iyer huet bei der Produktioun vun hirer neier Plack "KIND" keen Drock sech nei ze erfanne gespuert. Den Jamie Reinert huet sech mat der Musekerin ënnerhalen.

Programm

Net verpassen

  • Nei Museksemissiounen

    Bigstock / real_content

    Al Schanken: Freides, 21:00

    Mat Groove a Séil: Samschdes, 19:00

    Palatino FM: Samschdes, 21:00

Dossieren

  • AutorInne-Lies

    D'Publikatioun PM 19 10 huet d'Valerija Berdi inspiréiert fir déi akustesch Athmospär fir d'Buch ze liwweren. Hatt huet sech dofir op de Wee gemaacht an eng ganz Rei Andréck bei Autorinnen an Auteuren doheem akustesch agefaangen.

  • #beethoven20

    De Jean Muller gëtt an 32 Episoden en déiwen Abléck an de Kosmos vum Ludwig van Beethoven senge Pianossonaten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen