Wëlle Westen The Magnificent Seven, kee "magnificent" Western
Et ass bal 50 Joer säit dem Film mam Steve McQueen a Yul Brynner hir. Elo schécken Hollywood an den Antoine Fuqua aus Manktem un Imaginatioun den Denzel Washington a sechs weider Revolverhelden am "The Magnificent Seven" Remake an de Wëlle Westen, fir eng ganz Stad virum Béisen ze retten.
De Genre vum Westernkino ass nieft dem Jazz déi eenzeg Konschtform, déi een als wierklech amerikanesch klassifizéiere kann. De Western ass esou amerikanesch, datt déi franséisch Filmkritik an hirer grousser Zäit den Terme vum "plan américain" salonfäeg gemaach huet. Dëse Plang war zwar net exklusiv op de Western gemënzt. E gëtt awer am léiwsten esou beschriwwen, datt een de Personnage esou an d’Bild setzt, datt een d’Pistoul gutt ka gesinn. Den Howard Hawks war dee Meeschter vun dësem Plang.
De Westernfilm ass esou amerikanesch, datt am Italien vun den 1960er Joren eng ganz Filmbeweegung opkomm ass, déi Dekonstruktioun an Hommage gläichzäiteg war: Den Italowestern. An dann d’Winnetou Filmer ... Tatsaach ass, datt de Western am zäitgenëssesche Kino zimlech rar geséint ass. A well dat esou ass, freet ee sech op esou Filmer wéi "The Magnificent Seven" vum Antoine Fuqua.
Ee problematesche Film
De Realisateur bréngt e Cast aus allen Häre Länner a Faarwen zesummen. Vir un der Spëtzt steet säin acteur-fétiche, den Denzel Washington. D’Geschicht ass bekannt a séier erzielt: De Peter Sarsgaard terroriséiert eng kléng Stad am Wëlle Weste fir un d’Goldressourcen ze kommen. Déi eenzeg Fraeroll vum Film trëtt un den Denzel erun, fir net nëmmen hire Mann ze rächen, mee virun allem d’Stad aus de Fäng vum Béisen ze retten.
Lues a lues trommelt de Washington seng sechs Acolyten zesummen, fir sech am finale Showdown ronn 200 Mann ze stellen. Esou einfach, esou efficace. De Film ass duerchaus kuerzweileg. An awer muss op mannst op ee grondsätzleche Problem opmierksam gemaach ginn. 2016 kann ee ganz einfach keen esou e Western méi maachen!
Net iwwerzeegend
Bei alle Genrereferenzen, mat deenen de Film vu vir bis hanne gespéckt ass, brauch e Western am Joer 2016 entweder ee Post- oder Metatwist, wéi am Tarantino sengem "Django Unchained" oder "The Hateful Eight". Oder et ass een enttäuscht a seent sech entweder no engem Kino, deen et a senger Puritéit net méi gëtt - oder no engem romantiséierte Gefill vun Amerika, dat et esou iwwerhaapt guer net ginn ass.
Dem Fuqua säi gréisste Makel ass, datt hien all d'Coden vum Genre vum Esprit hir falsch rekreéiert. Aus engem glasklore Showdown mécht hien zum Beispill een éiweg laangen drëtten Akt, eng Mëschung aus "Die Hard" an "Home Alone" mat Cowboyhitt. Et ass dem Denzel, Chris Pratt, Ethan Hawke a Co, alleguerten hallef gebaakte Personnagen, ze verdanken, datt dëse Film net komplett u Bluttaarmut versickert.
An der Mediathéik:
LauschterenMéi zum Thema
La Danseuse: Dänzerbiografie mat wéineg Danz
"La Danseuse" ass ee fräi adaptéierte Biopic iwwer d'Loïe Fuller, eng vun de Pionéierinne vum Modernen Danz. De Film thematiséiert hir Zweiwel an hir Rivalitéit mat der Dänzerin Isadora Duncan.
Wat ass den neie Burton wäert?
Dem Tim Burton säi jéngste Film "Miss Peregrine’s Home for Peculiar Children" ass eng Aventure mat Zäit-Loopen, ongewéinleche Kanner mat nach méi ongewéinleche Fähegkeeten a mat Monsteren, deenen Tentakelen aus dem Mond wuessen.
Cézanne et moi: Biopic mat Schwächten
De Film iwwer d'Frëndschaft tëscht dem Émile Zola an dem Paul Cézanne kënnt net richteg un d'Rullen. Den Zeenario, d’schauspilleresch Leeschtung an d’Musek loossen ze wënschen iwwereg.
Juste la fin du monde: Emotional-hysteresche Familljendrama
Ëm alles anescht wéi eng "Happy Family" geet et am Xavier Dolan sengem rezentste Wierk. Hei streit eng franséischer Starbesetzung sech 95 Minutten laang iwwert plomp Familljekonflikter.
