Portrait Den Abdulrazak Gurnah gouf mam Literaturnobelpräis 2021 ausgezeechent

Abdulrazak Gurnah heescht de Laureat vum Literaturnobelpräis 2021. Den Nobelpräiscomité huet den 73-järege Schrëftsteller, deen a Groussbritannien lieft, ausgezeechent fir seng empathesch Narratioun, déi ouni Kompromësser ass, iwwer d'Auswierkunge vum Kolonialismus a dem Schicksal vu Flüchtlingen tëschent verschiddene Kulturen a Kontinenter.

Valerija Berdi / cbi

Abdulrazak Gurnah
Den Abdulrazak Gurnah ass de Laureat vum Literaturnobelpräis 2021. Foto: picture alliance / StockPix | Ger Harley | EdinburghEliteMedia.co.uk

Wann een dem Abdulrazak Gurnah seng Bicher an enger franséischer oder däitscher Iwwersetzung liese wëllt, da muss ee sech wuel elo nach e bësse gedëllegen.

Zéng Romaner huet den Auteur op englesch geschriwwen, dovu sinn der dräi op Däitsch a fënnef op franséisch iwwersat ginn, déi meescht dovun awer vergraff, mee do wäerten elo Neioploen a weider Iwwersetzungen net op sech waarde loossen.

Vu Tansania a Groussbritannien

Wien ass den Abdulrazak Gurnah iwwerhaapt? Wat een esou iwwer hie liest, schéngt et sech ëm e ganz bescheidenen, zeréckhalende Mënsch ze handelen, dee sech selwer mol net als Schrëftsteller bezeechne wëllt.

De Gurnah ass am Alter vun 18 Joer aus sengem Heemechtsland Tansania geflücht a mat 21 Joer huet hien ugefaangen ze schreiwen - op englesch. Et ass a Groussbritannien, wou hie studéiert huet a mat kuerzen Ënnerbriechungen op der University of Kent als Professer geschafft huet, bis zu senger Pensioun.

Refugiéen a Postkolonialismus am Mëttelpunkt

Postkoloniaalt Schreiwe war säi akademescht Gebitt an de Kolonialismus an d'Auswierkunge vun dësem sinn och Sujete vu senge Wierker. Dat bekanntste Wierk vun him dierft de Roman "Paradise" sinn, deen 1994 fir de Booker-Prize nominéiert war.

An dësem Roman geet et ëm en 12-järge Jong, dee vu sengen Elteren als Sklav verkaf gëtt, well de Papp ze vill Scholden huet an déi ofbezuele muss. Et ass den Ufank vum 20. Joerhonnert an den éischte Weltkrich steet virun der Dier, deen och Ostafrika erreecht.

A weidere Romaner schreift de Gurnah Geschichten iwwer schwiereg Léiften tëschent Mënsche mat ënnerschiddlechen Hautfaarwen, Reliounen, Originnen, esou am Roman "Desertion", wou e Bou gespaant gëtt vum Kolonialismus bis zu der Onofhängegkeet vun ostafrikanesche Staaten. Protagoniste si Geschwëster, déi all Tumulter a Changementer vu politescher wéi emotionaler Bedeitung materliewen.

Refugié sinn - dat huet den Abdulrazak Gurnah um eege Leif erlieft, wat dann och de Sujet a senger Literatur ass, zum Beispill am Roman "By the Sea", wou e jonke Mann aus Sansibar mat gefälschte Pabeieren um Flughafen zu London lant. Et ass eng Geschicht, déi hei erzielt gëtt, awer och d'Geschicht vun Afrika, an déi kollektiv Memoire ass de Schwéierpunkt vun dësem Wierk.

Eng Ausernanersetzung mat Afrika

En Auteur, dee bei eis an an eisen Nopeschlänner weider net bekannt ass, mee dat wäert sech mat dësem Präis wuel änneren.

Et ass gewëss och eng politesch Decisioun vum schwedesche Comité, deen dëse Choix getraff huet. Eng literaresch Ausenanersetzung mat Afrika vun haut a vu gëschter kéint vläicht deem Engem oder Aneren eng méi oppen an aner Vue op d'Situatioun vu Refugiéen erlaben.

Méi zum Thema

Amanda Gorman
Amanda Gorman - The Hill We Climb - Den Hügel hinauf

D'Armanda Gormann huet vill vu sech schwätze gedoen: d'Gedicht vun der amerikanescher Lyrikerin, virgedroe bei der Inauguratioun vum Joe Biden, koum elo an enger englesch-däitscher Ausgab eraus.

Net verpassen

  • Offre d'emploi: Programmchef

    radio 100,7

    Den Etablissement de Radiodiffusion Socioculturelle, deen de radio 100,7 bedreift, sicht en/eng neie/nei Programmchef/fin mat engem Aarbechtsvertrag op onbestëmmten Dauer (CDI) fir 40 Stonnen d'Woch.

Programm

Dossieren

  • CinÉast 2021

    Et ass déi véierzéngt Editioun vum CinÉast Filmfestival. Vum 7. bis de 24. Oktober ginn Featuren a Kuerzfilmer aus Länner aus Mëttel- an Osteuropa gewisen. Siwe Filmer sinn an der Kompetitioun.

  • Bundestagswal 2021

    Däitschland wielt de Samschdeg, 26. September en neie Bundestag. Wat sinn d'Enjeuen, wie gëtt Kanzler oder Kanzlerin, wéi verleeft d'Wahlkampagne. An eisem Dossier zum Theema Bundestagswal gidd Dir alles gewuer.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen