Den Hotel Europa zu Sarajevo: En dichtegen EU-Emissaire ass op Visite fir eng Ried ze halen. Ee serbeschen Nationalist mam Numm Gavrilo Princip deelt an engem Televisiounsinterview um Daach vum Gebai seng Onzefriddenheet iwwer Bosnien mat. D’Mataarbechter vum Hotel sinn zanter zwee Méint net bezuelt ginn a bereede sech op ee Streik fir. All dës Elementer mussen den Hotelmanager Omer a seng Adjointe Lamija iergendwéi an d'Rei bréngen.
De Marc Scheffen, dee fir d’Programmatioun an der Cinémathéik zoustänneg ass, schwätzt beim Danis Tanoviḉ sengem Wierk vun engem komplexe Film. E wier awer interessant, well e mat sozialen Komponente spille géif - wéi zum Beispill mat deene veschidde Schichte vun der Gesellschaft.
E Liewen tëscht zwou Welten
Esou gëtt am Film déi steril Façade vum Hotel mat den däischteren an dompegen ënneschte Stäck kontrastéiert. Den Hotel Manager zirkuléiert tëscht deenen zwou Welten: Där, vun den ënnerdréckten Aarbechter. An där, vun de privilegéierte Gäscht an den deiere Suiten. Den Omer lieft an der Vergaangenheet. Hie widderhëlt de Gäscht. datt den Hotel scho vill bekannt Visiteuren empfaangen huet, ënnert anerem de Bill Clinton, Richard Gere a U2. Seng verstëbste Manéier fir den Hotel ze geréieren, huet zu massive Scholde gefouert. Den Hotel Europa ass um Punkt ënnerzegoen.
Déi verschidden Zeenen op den ënnerschiddleche Stäck gi fléissend duerch eng agil Kameraféierung matenee verbonnen. Am Groussen a Ganzen ass "Death in Sarajevo" een impressionnante Film mat engem kritesche Bléck op d’Vergaangenheet vu Bosnien an op d'Zukunft vun Europa.
E Bléck op zentral- an osteuropäesch Filmer
De CinEast gëtt dem Publikum eng cinematographesch Siicht op d’Welt, aus dem Bléckwénkel vun zentral- an osteuropäesche Länner. Filmer also, déi een hei zu Lëtzebuerg net a grousse Quantitéiten ze gesi kritt. De Nick Rollinger vun Equinox Productions fënnt et spannend, d'Filmer an dësem Deel vun Europa ze gesinn. Filmer, déi vill Wäermt an Humanismus géife weisen.
D'Cinémathéik ass ee vun den Haaptpartner vum CinEast-Festival. De Bosneschen Drama "Death in Sarajevo" huet de CinEast-Festival lancéiert an de Film ass de 15. Oktober um 18 Auer nach emol an der Cinémathéik ze gesinn. De Festival CinEast dauert nach bis den 23. Oktober