Big Friendship: How We Keep Each Other Close Eng Maturitéit, mat Frëndschaft ëmzegoen

Frëndschaft ass eng Bezéiung, déi zwar net institutionaliséiert ass, mee zu de wichtegsten am mënschleche Liewe gehéiert. D'Ann Friedman an d'Aminatou Sow, zwou amerikanesch Autorinnen, hunn hirer Frëndschaft mat "Big Friendship" e ganzt Buch dediéiert.

Sarah Pepin / cbi

Buchkritik Big Friendship - How We Keep Each Other Close
Bild: Bigstock / Natallia Boroda; Simon&Schuster

D'Chimie huet gestëmmt. Esou kann een de Ufank vun der Ann Friedman an der Aminatou Sow hirer Frëndschaft beschreiwen. Eng Frëndin vun deenen zwou Fraen huet si enee viru méi wéi zéng Joer virgestallt, an et war, dat huet och déi Frëndin deemools scho geaant, e "good match", wéi een op englesch seet.

A "Big Friendship", dem éischte Buch vun hinnen, retracéieren déi zwou Frëndinnen de Wee vun hirer éischter Renconter zu Washington iwwer d'Héichten an d'Déifte vun hirer Frëndschaft.

Eng staark Frëndschaft

Dat kléngt bal wéi eng klassesch Libesgeschicht tëschent der amerikanescher Journalistin Ann Friedman, déi am Bundesstaat Iowa grouss gouf, an der Aminatou Sow, enger digitaler Strategin a Businessfra, déi a Nigeria opgewuess ass. Mee dat ass et awer net, och wann et sech mat Momenter esou liest.

"Big Friendship" ass hiren eegenen Term, dee si als eng Frëndschaft, fir déi et sech ze kämpfe lount, begräifen. Als staarke Rapport, deen d'Liewe präägt, geneesou vill an heiansdo vläicht méi wéi romantesch Partnerschaften.

Hei ass et, wou "Big Friendship" eng interessant an duerchaus wichteg gesellschaftlech Roll anhëlt. Et mierkt een, datt d'Autorinnen dës Form vu Bezéiungen tëschent de Mënsche méi wëllen op d'Agenda setzen.

Frëndschafte sinn net institutionaliséiert

Wie weess net, wéi wéi et deet, wann eng laangjäreg, oder eng frësch, mee schéi Frëndschaft op en Enn geet? Mee gesellschaftlech ass et acceptéiert de Réck ze dréien, wann iergendeppes net méi klappt. Dacks gëtt sech weder ausgeschwat nach un de Problemer geschafft.

Doduercher, datt d'Bezéiung net wéi e Mariage institutionaliséiert ass, an et och keng Famill ass, gëtt et kee soziale Skript dofir, wéi ee sech ze verhalen huet - et léisst ee sech jo net scheeden. Vläicht knuppt et, oder et lieft ee sech tatsächlech auserneen.

Et ass net alles einfach oder schéin

Och d'Ann an d'Aminatou waren ufanks am Glawen, datt Frëndschaft en Espace duerstellt, deen engem eng Paus vun den ustrengende Saachen am Liewe bitt. Déi Attitüd ass an eiser Gesellschaft wäit verbreet. Mee alles, wat iergendwéi e Wäert huet, ass jo net ëmmer nëmmen einfach oder schéin.

Iergendwann gouf et och bei der Ann Friedman an der Aminatou Sow schwiereg - wat och domadder ze dinn hat, datt si Aarbechtskolleeginne goufen, si produzéieren de Podcast "Call your Girlfriend" zesummen. Dee Moment hu si och net richteg gewosst, wéi domadder ëmzegoen ass. Iergendwann hu si decidéiert eng Therapie ze maachen, fir hir Frëndschaft ze retten. Dat kann een iwwerdriwwe fannen, ongewéinlech ass et op jiddwer Fall.

Wéi geet et mat Frëndschaften ëm?

Dat ass et, wat "Big Friendship" auszeechent. Eng Maturitéit, mat Frëndschaft ëmzegoen, déi engem seele begéint, an e Wëllen, sech engem schwierege Prozess opzemaachen a Saachen ze konfrontéieren, u sech ze schaffen, einfach well et sech lount.

Un dëse Volet denkt een dann och, wann d'Lecture ee plazeweis nervt, well den Toun esou amerikanesch ass, an domat ass gemengt coacheg an affirmativ. Hir Vulnerabilitéit an erfrëschend Perspektiv op dës ënnerschate mënschlech Bezéiung tréischten doriwwer ewech, datt den assuréierten Toun vun den Autorinnen heiansdo bal an Arroganz ëmschléit.

Schlussendlech ass et erfrëschend ze liesen, wéi zwou Frae sech iwwer d'Competitioun ewechsetzen, déi a verschiddene weibleche Frëndschaften eng ze grouss Roll spillt. Et ass fir d'Ann Friedman an d'Aminatou Sow e feministeschen Akt fir den Aspekt vun der Collaboratioun ze stäerken. Och dofir hu si e Wuert erfonnt: "Shine Theory" bedeit, datt ee sech géigesäiteg ënnerstëtzt. Ganz nom Motto: "I don't shine if you don't shine".

Méi zum Thema

Das Ende vom Lied
Jean Krier - Das Ende vom Lied

De Jean Krier war ee vun de preeminente Géigewaartsauteuren an huet e Wierk hannerléisst, dat iwwer d'Grenzen eraus vill beuecht gouf. Editions Phi huet seng markantst Gedichter zesummegedroen.

Enfance, instantanés
Carla Lucarelli - Enfance, instantanés

An hirem Buch "Enfance, instantanés" begrenzt d'Carla Lucarelli hir Erënnerungen un d'Kandheet, un d'Momenter bis si an de Lycée kënnt. Opwuessen am Minett, Verlaangeren no Italien, eng Zäit vum Entdecken a wëlle begräifen.

Robert Seethaler  - Der letzte Satz
Kultur

1911 begab Gustav Mahler sich auf seine letzte Reise. Sie führte den todkranken Komponisten von New York über den Atlantik zurück nach Europa, wo er wenige Wochen später im Alter von 51 Jahren starb.

Das Seidenraupenzimmer
Sayaka Murata: Das Seidenraupenzimmer

Sayaka Murata schreibt seit Jahren gegen Leistungsdruck und festgefahrene Rollenmuster. In "Das Seidenraupenzimmer" entwirft sie eine Schreckensvision von den Folgen der Verletzungen des kollektiven Drucks.

Programm

  • Vu 6 bis 10

  • On air

    Vun 10 bis 2

  • Resonanzen

  • Vun 3 bis 6

  • Tockcity

Net verpassen

  • Offre d'emploi: 1 responsable ressources humaines (m/f)

    HR Human Resources

    L'Etablissement de Radiodiffusion Socioculturelle recherche 1 responsable ressources humaines (m/f) sous contrat à durée déterminée en vue du remplacement d'un congé de maternité et d'un congé parental à temps plein.

Dossieren

  • CinEast-Festival 2020

    De CinEast-Festival weist eng Selektioun vu mëttel- an osteuropäesche Filmer. Déi 13. Editioun ass wéinst der Covid-Pandemie eng hybrid: d'Filmer gi souwuel um groussen Ecran wéi och online gewisen.

  • AutorInne-Lies

    D'Publikatioun PM 19 10 huet d'Valerija Berdi inspiréiert fir déi akustesch Athmospär fir d'Buch ze liwweren. Hatt huet sech dofir op de Wee gemaacht an eng ganz Rei Andréck bei Autorinnen an Auteuren doheem akustesch agefaangen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen