Radioen

On air

Notturno  |  Nicholas Krgovich - Lucklucky

play_arrow Live
arrow_back_ios

100komma7.lu

100komma7.lu

/ Alain Damasio

Literatur

Alain Damasio

De renomméierte franséische Science fiction-Auteur anticipéiert mat sengem Roman "Les Furtifs" (Editions La Volte) déi geféierlech Entwécklunge vun der Kontrollgesellschaft. Wat net wëllt heeschen, datt an Zukunft kee Widderstand méiglech ass - souguer an enger onerwaartener Form! De Michel Delage huet sech um Festival "Étonnants voyageurs" zu Saint-Malo mam Alain Damasio ënnerhalen.

auto_stories

1 min

"Livre-univers": sou bezeechent den Alain Damasio säin drëtte Roman "Les Furtifs". Dräi Romaner an 20 Joer huet hie publizéiert, woubäi de grousse Succès a Frankräich 2006 mat sengem zweete Wierk, "La Horde du Contrevent", koum.

"Les Furtifs" ass an allen Hisiichten ambitiéis, vun der Längt hir (bal 700 Säiten), wat de Stil betrëfft (eng immens kreativ Sprooch, déi plazeweis u "poetry slam" erënnert) bis hin zu engem Spill mat der Typographie an engem Soundtrack, deen d'Buch begleet.

Klaustrophobesch Klassegesellschaft a Widderstand

De Roman ass virun allem ambitiéis well den Alain Damasio eng Welt schaaft: d'Anticipatioun vun eiser Gesellschaft ëm d'Joer 2040, an där d'Tendenze vun der Géigewaart (Iwwerwaachung, Kontroll, Privatiséierung) sech negativ zouspëtzen a sech zu enger extrem klaustrophobescher Klassegesellschaft weider entwéckelen.

Den Damasio léisst awer och Plaz fir d'Hoffnung. Geet et dem Auteur no, dann ass och nach an 20 Joer mat massivem Widderstand ze rechne vu Leit, déi sech vum Liewen eppes aneschters erwaarde wéi onkriteschen Hyperkonsum.

"Les Furtifs" maachen d'Dier op fir eng Utopie, an där sech d'Mënschen an d'Déieren op eng onerwaarte Manéier kënne begéinen an een deen aneren ënnerstëtzen. Et ass de Fonken Hoffnung, deen enger Koppel hëlleft, de Verloscht vun der Duechter z'iwwerstoen...