Klimabank Nei Subventioune fir Sanéierung
Mam Aféiere vun enger Klimabank wëllt d’Regierung d’Albausanéierung fërderen. Et ass keng Bank, mee eng Partnerschaft tëscht dem Staat a konventionelle Bankinstituter, erkläert den DP-Deputéierten Max Hahn. Hien ass Rapporter vum Gesetzprojet iwwert déi nei Klimabank.
Bal d'Halschent vun de Wunnengen zu Lëtzebuerg goufe virun 1970 (also virun der Pëtrolskris) gebaut a sinn net gutt isoléiert. De Logement mécht 15 Prozent vun den CO2-Ausstéiss zu Lëtzebuerg aus. Duerch des d'Klimabank wéilt een och een Deel vun de Klimaschutzziler erreechen, seet de Max Hahn
Prêt ouni Zënse fir d'Albausanéierung
D'Subventiounen déi de Staat fir d'Sanéierung an der Vergaangenheet proposéiert huet, hätten net esou gutt funktionéiert wéi geplangt, wëll d'Stéit d'Aarbechten hätte misste virfinanzéieren, sou den DP-Deputéierten. Mat der Klimabank kréiche mannerbemëttelt Stéit eng Garantie vum Staat an ee gënschtege Prêt ouni Zënse vu maximal 50 000 Euro accordéiert. Derbäi kéim eng Prime vun 10 Prozent an eng gratis Energieberodung.
Och Proprietaire vu Mietwunnengen oder Stéit mat méi héijem Revenu kéinten am Fall vun enger Albausanéierung eng Zënsbonifikatioun ufroen. De Staat géif 1,5 Prozent un Zënse bäi engem Prêt vu maximal 100.000 Euro pro Wunneng bezuelen.
Guichet unique fir sämtlech Bäihëllefen
Op enger eenzeger Plaz zu Hollerech am Guichet unique kéint een an Zukunft eng Berodung oder eng Subventioun am Beräich vum Wunnengsbau oder der Energieeffizienz ufroen. An deem Guichet unique wiere souwuel de Logementsministère ewéi och de Nohaltegkeetsministère vertrueden. Doduerch kéint een direkt op der Plaz konkret gesot kréien, ob ee verschidde Kritären erfëllt fir an de Genoss vun enger Subventioun oder vun engem Klimaprêt ze kommen, sou den Max Hahn.
Qualitéit vun der Sanéierung verbesseren
Ee weidert d’Zil vun der Regierung wier et, datt d'Sanéierung richteg duerchgefouert gëtt. "Et geet net duer eng Fënster z'ersetzen, soss riskéiert een datt d'Mauere fiicht ginn an datt Schimmel entsteet", warnt de Max Hahn. Fir dat ze verhënneren, géife verschidde Bäihëllefen un eng Energieberodung gekoppelt ginn.
Iwwert de LENOZ, déi Lëtzebuerger Nohaltegkeet-Zertifizéierung fir Wunnengen, wéilt den Ëmweltministère iwwerdeems den Asaz vun nohaltegem Baumaterial fërderen. Do géifen et jee no techneschen Installatiounen an no Material weider Subventioune vum Ëmweltministère ginn.
An der Mediathéik:
LauschterenMéi zum Thema
Iwwerverschëldung: Locatairë méi betraff wéi Propriétairen
Bei klenge Revenuë sinn héich Loyerspräisser séier eng Uersaach fir Iwwerverschëldung, seet de Christian Schumacher vum Service Endettement vun der Ligue Medico.
Wéi grouss ass de Risiko vun enger Immobilie-Blos?
Den EU-Systemrisiko-Rot warnt Lëtzebuerg. Déi héich Immobiliepräisser an d'Verschëldung kéinten ee Risiko duerstellen. D'Situatioun wier gréisstendeels ënner Kontroll, reagéiert d'Politik.
“Mir brauche Planungssécherheet”
D'Vereinfache vun de Prozeduren ass fir de President vum Ordre des architectes et ingénieurs conseil eng Prioritéit. A Saachen Energieeffizienz ass de Secteur dem Jos Dell no gutt opgestallt.
De Package "Klimabank an nohaltegt Wunnen"
De Projet Klimabank gouf vun der Regierung finaliséiert. Och d’PRIMe HOUSE fir d'Sanéierung a fir energieeffizient Baue gouf fundamental ofgeännert. Hei gëllen nei Nohaltegkeetscritèren.
