Aarmut Lëtzebuerg: den Eldorado?

D'Aarmut zu Lëtzebuerg wiisst. All Dag kommen nei Gesiichter dobäi, seet d'Alexandra Oxacelay. 2014 war d'Asbl vu Bouneweg op 600 Meter Carré op Hollerech geplënnert. An der Mëttesstonn huet d'"Stëmm vun der Strooss" dëse Summer hir Dieren zäitweis awer missen zoumaache wéinst zevill Undrang. An de Spëtzestonne koumen eleng zu Hollerech 300 Persounen den Dag op de Site vun Hollerech iessen. "Dat féiert zu Aggressiounen ënnert de Clienten a géigeniwwer de Mataarbechter vun der Asbl", seet d'Alexandra Oxacelay.

Si fuerdert zousätzlech zu de bestoenden Initiativen, fir dat ganzt d'Joer eng Offer wéi "d'Wanteraktioun". Am de Wanterméint bidde staatlech a lokal Autoritéiten Iwernuechtungsméiglechkeeten, Iessen an e medezinesche Service un fir Leit ouni Dag iwwert dem Kapp.

"Mir brauchen nei Raimlechkeeten"

D'Asbl huet bei der Gemeng Lëtzebuerg an dem Gesonheetsministère e Projet agereecht, fir weider Capacitéiten zur Verfügung gestallt ze kréien.” Mir waarden dréngend op eng Äntwert”, esou d’Chargée de direction vun der Asbl. Gebrauch gëtt eng weider nei Infrastruktur am Garer Quartier. Och am Norde vum Land misst et eng Ulafstell gi fir Leit ouni Dach iwwert dem Kapp, seet d’Alexandra Oxaceley.

Zu Esch huet d’Stëmm vun der Strooss zanter 2012 eng Opfaangstruktur. 40 fest Mataarbechter schaffen op dräi verschiddene Site fir déi sozial ONG. "Mir hunn elo scho Problemer, an de Wanter kënnt eréischt". D’Offer misst och dezentraliséiert ginn. och de Norde vum Land bräicht esou eng Initiativ wéi "d’Stëmm".

2015 huet d'Associatioun bal 150 Tonnen Iesse verdeelt an iwwer 70.000 Moolzechte servéiert. D'"Stëmm vun der Strooss" betreit Mënsche vu 84 verschiddenen Nationalitéiten, mat enger Altersmoyenne vun 35 Joer. 20 Prozent si Lëtzebuerger, dernieft sinn et Leit aus der Groussregioun, Refugiéen, Kranker a Monoparentauxen, déi op d’Hëllef vun der ONG ugewise sinn. "Et gëtt kee Profil-Typ", seet d’Chargée de direction.

Lëtzebuerg ass e räicht Land, mat engem Sozialnetz wat gutt ausgebaut ass. "Et komme Leit, déi hei en neit Liewe wëllen opbauen", seet d’Alexandra Oxacelay. Si sichen no neie Perspektiven an enger Aarbecht. Dofir feelt et awer heefeg un de néidege Sproochekenntnisser a Formatiounen. Vill Cliente vun der Stëmm liewen an der Illegalitéit an hu keng Pabeieren. Et géifen esouguer Patrone ginn déi sech bei der Asbl mellen, op der Sich no bëllegen Aarbechtskräften ouni Kontrakter un ze bidden.