Faschismus Donald Trump: Eng urfaschistesch Naup ze vill

An hirer Proklamatioun zum nationale Commemoratiounsdag huet d'Lëtzebuerger Regierung rezent un den Appell "Ni méi Faschismus" erënnert. An den USA mécht e Presidentschaftskandidat de selwechte Faschismus salonfäeg.

Denis Scuto / cwi

Denis Scuto
Den Denis Scuto ass Historiker op der Uni Lëtzebuerg

Den 9.Oktober war zu Lëtzebuerg den nationale Commemoratiounsdag. An enger Proklamatioun huet d'Regierung dorun erënnert, datt am Zweete Weltkrich ënnert däitscher Occupatioun, Fraen, Kanner, Männer, Aler a Jonker fir hiert Land a fir eng fräi Gesellschaft gestuerwe sinn. An datt si eis d'Responsabilitéit an d'Obligatioun leguéiert hunn, eis och haut fir eng fräi Gesellschaft, fir Solidaritéit, fir d'Wäerter vun Humanitéit an Toleranz a fir de Respekt vun de Mënscherechter anzesetzen.

Et geet also net ëm Erënnerung als Selbstzweck, mee ëm déi zentral Froen, déi d'Katastrophe vun de leschten honnert Joer eis stellen: Wat fir eng Konsequenzen zéie mir haut aus de vergaangenen Evenementer? Wéi reagéiere mir haut a wat maache mir haut géint ähnlech Phänomener?

Den Donald Trump

Wéi séier d'Gespenster vu fréier nees erëmkommen, weisen am Moment d'Presidentschaftswahlen. An dat grad an den USA, dem Land vun deenen Alliéierten, vun deenen d'Proklamatioun vun der Lëtzebuerger Regierung schwätzt.

Well, och wann dat kaum ze gleewen ass, huet do e Faschist et bis an déi lescht Ronn vun de Presidentielle gepackt. Hie versicht Ufank November d'Hillary Clinton ze klappen an de 45. President vun de Vereenegte Staaten ze ginn. An dat obwuel hie schonns viru bal engem Joer vu Kollegen aus senger eegener Partei, de Republikaner, als dat entlarvt gouf wat en ass. En Urfaschist. Esou wéi den Umberto Eco, iwwregens an enger Ried zum 50. Joresdag vun der Befreiung vun Europa vum Nationalsozialismus dës Ideologie definéiert huet.

En Urfaschist

Och wann hien net all d'Charakteristike vun engem Urfaschist huet, kultivéiert den Donald Trump zum Beispill de Kult vun der Aktioun wéinst der Aktioun, lassgekoppelt vum Denken - well Denken ass fir d'Urfaschisten eng Form vu Kastratioun.

Wéi all Urfaschist verdréit hie keng Kritik. Kritik ass Verrot. Wéi all Urfaschist huet hien eppes géint d'Villfalt vun de Meenungen, mee och vun de Mënschen. An hien notzt d'Angscht virun den Anere politesch aus. Beim Hitler waren et sougenannt net-aresch, mannerwäerteg Rassevertrieder. Beim Trump sinn et illegal Immigranten a Flüchtlingen.

Wéi am Urfaschismus, profitéiere Politiker, wéi den Donald Trump vun den individuelle Frustratiounen. Si appelléieren u sozial Schichten, déi ënnert der ekonomescher Kris leiden oder sech politesch gedemütegt fillen. An engem selektive Populismus versprécht de Republikaner hinnen, datt hien nees Sécherheet a Wuelstand hierstellt:

"You're going to say to your children, and you're going to say to anybody else, that we were part of a movement to take back our country. (...) And we will make America great again."

Wéi all Urfaschist ass den Trump e fanateschen Nationalist, dee säi Land géint eng international Verschwörung muss verdeedegen. Beim Hitler war et dat sougenannt Weltjuddentum. Beim Trump sinn et d'Chinesen an d'Mexikaner déi d'USA humiliéieren.

Sech selwer ofgeschoss

Dat alles wëssen esouguer d'Leit aus sengen eegene Reie schonns zënter Méint, an trotzdem konnt den Trump laang net gebremst ginn. Zum Verhängnes gouf dem Trump dann elo awer glécklecherweis eppes Weideres, wat e mat den Urfaschiste gemeinsam huet. An dat den Umberto Eco och treffend beschriwwen huet. Well obwuel Krich an Heroismus zimlech schwiereg Spiller sinn - et kann een natierlech op d'mannst mat Waffe spillen, uginn a fir hir Verbreedung plädéieren, wéi den Trump - mee soss iwwerdréit den Urfaschist säi Wëllen zur Muecht op d'Sexualitéit, op de Machismo an seng Fraeveruechtung.

Ech si frou, datt den Trump sech elo definitiv selwer ofgeschoss huet. Mee ech maache mir awer e bësse Suergen doriwwer, datt seng Haltung zur Sexualitéit an zu de Fraen - an net seng Astellung zu Demokratie an zu Mënscherechter - dësen Adepte vum Urfaschismus konnt stoppen.

Wann et a Frankräich d'selwecht geet an d'Mënschen och do d'Léieren aus de Katastrophë vum 20. Joerhonnert gréisstendeels vergiess hunn. Da froen ech mech nämlech, wien a wat d'Marine Le Pen d'nächst Joer soll ophalen?

An der Mediathéik:

Fräie Mikro / / Denis Scuto
Lauschteren

Méi zum Thema

Jonathan Alter a Michael Meehan
US-Presidentiellen

Eng Rekordzuel u Leit hunn déi éischt Presidentschaftsdebatt tëscht Trump a Clinton verfollegt. Wou kënnt deen Interessi hier a wat fir en Afloss hunn d'Medien op d'Presidentiellen?

Simone Beck Meenung
Wahlkampf USA

Den Donald Trump huet dozou bäigedroen, datt Rassismus, Misogynie, primitiv Iwwerleeungen a Steierbedruch presidentiabel sinn. Et ass schwéier ze verstoen, datt hie Presidentschaftskandidat ass.

Cléo Thoma Meenung
Medien

Firwat dréinen all d'Leit der Presidentschaftskandidatin de Réck? Als Old-School-Ditt, déi net an der Selfie-Kultur grouss ginn ass, huet d'Cléo Thoma eng Zäit gebraucht, fir d'Zeen ze verstoen.

Parteikongress Demokraten.JPG
Wahlen an den USA

An 100 Deeg mussen d'Amerikaner en neie President wielen. No de Parteikongresser vun de Republikaner an den Demokraten annoncéiert sech een agressive Wahlkampf. D'USA riskéiere gespléckt ze ginn.

Programm

Net verpassen

Dossieren

  • Déi national Anti-Krise-Pläng an der EU

    Wat maachen d'Länner mat den Suen, déi hinnen aus dem Europäeschen Fonds de Relance zoustinn? An eiser Rubrik Europa Aktuell huele mer déi national Pläng ënner d'Lupe.

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen