Affär Miltgen Wier eng Disziplinarprozedur néideg gewiescht?

De 6. Mäerz 2015 hat de Regierungsrot decidéiert, den héije Beamten am Logementsministère vun zwou Attributiounen z'entbannen: an zwar als Member vun den Direktiounscomitéë vum Fonds du Logement a vum Fonds d'Assainissement de la Cité Syrdall. Dat mam Argument, dass déi deemoleg Logementsministesch Maggy Nagel kee Vertraue méi an hire Beamten hätt.

Den Daniel Miltgen hätt der Ministesch op vill Froen zu den Aktivitéite vum Fong keng Informatioune wëlle ginn, huet den Affekot vum Logementsministère de Mëtten erkläert. De President wier net bereet gewiescht, d'Regierungspolitik am Beräich Logement ëmzesetzen, sou ee weidere Reproche.

Vertrauensverloscht geet net duer

Géint seng Revocatioun huet den Daniel Miltgen ee Recours gemaach. Säin Affekot, de Maître Jean-Marie Bauler, argumentéiert, dass d'Nominatioun vum Daniel Miltgen fir een Zäitraum vu siwe Joer gülteg war a just iwwer de Wee vun enger Disziplinarprozedur kéint revoquéiert ginn. "Soss wier kee méi gewappnet, da kann all Fonctionnär wéinst 'perte de confiance' - wat ee ganz vagen Terme ass - revoquéiert ginn," sou de Maître Jean-Marie Bauler géigeniwwer der Press:

Den Affekot vum Logementsministère Maître Laurent Niedner wollt keen Interview ginn. Hien huet viru Geriicht argumentéiert, dass den Daniel Miltgen net vu senger Funktioun als "Premier Conseiller de Gouvernement" entbonne gouf, mee vun enger Nominatioun an den Direktiounscomité vun engem Etablissement Public. Déi Nominatiounen wieren net op Liewenszäit a fir eng Revocatioun wier keng Disziplinarprozedur néideg.

Funktioune vs. Nominatiounen

Am Gesetz iwwer de Fonds du Logement géif et heeschen, dass de Grand-Duc dës Memberen nennt a revoquéiert. An dorunner wiere keng weider Konditoune gebonnen, sou de Maître Laurent Niedner. D'Regierung kéint hire Vertrieder am Direktiounscomité vum Fonds du Logement ofsetzen, wann se sech duer dës Persoun net méi adequat vertruede gesäit. Op d'Funktioun vum concernéierte Beamten hätt dat keen Afloss an deemno wier och keng Disziplinarprozedur néideg.

Mat engem Uerteel ass an den nächste Wochen ze rechnen.