Den Ament konzentréiert ee sech op d‘Opraumaarbechte vun de Schied, heescht et op eis Nofro hin aus dem Ëmweltministère. Demnächst soll méiglecherweis een Expert vun der ITM d’Situatioun op der Platz analyséieren.
Nummer sécher awer keng Panik
Och wann Asbest un der Loft net esou geféierlech ass, wéi an engem zouene Raum, wollt een als Gemeng op Nummer sécher goen an d’Awunner fréizäiteg warnen, sou nach de Lou Linster. Onnéideg Panik verursaache wéilt een awer och net.
D’Police wier aktuell scho mat spezielle Mooss-Apparater am Asaz, erkläert de Leidelenger Buergermeeschter Lou Linster.
“Dat war jo och een Eternit-Daach op engem Deel vun der Scheier, dat ware jo och déi kleng Explosiounen, déi d’Leit wärend dem Brand héieren hunn, wou et dann sou gepätscht huet. An da waren awer och nach Stockagen vun deenen Eternits-Daach-Zillen, déi hannen am Haff waren, déi sinn deelweis geschmolt.”
D’Leidelenger Primärschoul bleift zwar haut normal op an den Unterrecht fënnt statt, mee d’Schüler mussen awer wärend de Pausen dobanne bleiwen, dat confirméiert d’Administratioun vun der Primärschoul.
Genee Wäerter kënnen net gemooss ginn
Genee Asbestwäerter an der Loft kann een awer net uginn erkläert den Ëmweltminister Serge Wilmes:
“Mir hu keng Grenzwäerter, déi festgesat si fir den Asbest an der Loft kënnen ze moossen. Dofir sinn och u sech eis Kontrollekippen déi et do gëtt net outiliéiert fir do iergendwéi Asbest festzestellen, dat ass momentan d’Situatioun.”
Iwwer d’Brandursaach, wéi och iwwer eng méiglech Entwarnung wollt de Leidelenger Buergermeeschter sech net äusseren an huet op d‘Enquête verwisen, déi nach leeft. En Donneschden wier ee weideren Expert op der Platz, fir z’analyséieren, wéi een de Site schnellstméiglech dekontaminéiert kritt, preziséiert nach de Lou Linster.