Ënner anerem d’Lëtzebuerger Wort huet geschriwwen, datt de Pilot am schlëmmste Fall d’Kontroll iwwer de Fliger kéint verléieren, wann de satellittegesteierten Navigatiounssystem gestéiert gëtt.
Mesure goufe geholl fir Risiken ze reduzéieren
Als Reaktioun op Virfäll an e puer Regioune vun der Welt an de leschte Méint, hätt d’Luxair déi vun de Fligerproduzente recommandéiert Prozedure séier ëmgesat. Domat sollen déi verbonne Risike reduzéiert ginn, esou d’Fluchgesellschaft an hirer schrëftlecher Positioun. Dozou gehéiert d’Ofschalte vum GPS-Signal an den Asaz vu konventionellen Navigatiounssystemer.
D’Luxair ënnersträicht, datt dës proaktiv Mesuren d’Sécherheet vun de Flich net géife beanträchtegen. D’Airline engagéiert sech, déi héchst Sécherheetsstandarde bei der ganzer Flott an op all hire Strecken anzehalen.
Stéierunge ginn iwwerwaacht
Virfäll vu GPS-Stéierunge géife virun iwwerwaacht ginn, an entspriechend Mesuren ergraff ginn, kënnegt d’Luxair un.
Hannert de Stéierunge vun der Satellittennavigatioun stieche méiglecherweis gezilten Attacken, huet d’Zeitung Trierischer Volksfreund geschriwwen. Zitéiert ginn am Artikel Experten, déi géifen unhuelen, datt Russland hannert dësen Attacke kéint stiechen.