An der Haaptstad Manilla an an de Provënze ronderëm sinn op d'mannst 20 Leit bis elo gestuerwen. Do gouf et grouss Iwwerschwemmungen an Äerdrutscher.
Virun der philippinnescher Côte ass iwwerdeems e Pëtrolsschëff ënnergaangen, dat annerhallef Millioune Liter Pëtrol gelueden huet. Vun de 17 Equipage-Membere goufen der 16 gerett. Eng Persoun gëtt vermësst.
Aus dem Schëff leeft Pëtrol an d‘Mier. E 4-Kilometer-laange Pëtrolsteppech hätt sech forméiert, esou e Spriecher vun der Küsten-Iwwerwaachungs-Autoritéit. Et géif probéier ginn, d‘Fuitte am Schëff ze stoppen. Wéinst vill Wand an héije Welle wier dat awer schwéier.
En anert Transportschëff ass virun der Küst vum Taiwan ënnergaangen. Do ginn 9 Membere vum Equipage vermësst. Um taiwanesche Land si bis elo dräi Leit wéinst dem Taifun ëm d‘Liewe komm.