Max Tholl (Paräis)
Gëschter koum de Michel Barnier mat der Marylise Léon, Generalsekretärin vun der gréisster Gewerkschaft, der CFDT, zesummen.
Barnier bereet iwwer Steiererhéijung fir grouss Entreprisen ze schwätzen
Dës huet no der Entrevue vun enger konstruktiver Renconter geschwat a sot de Barnier hätt hir ze verstoe ginn, datt hien a sengem Regierungsprogramm, deen d'nächst Woch presentéiert gëtt, konkret Äntwerte wäert liwweren.
D'CFDT huet dem Barnier 40 Säite Revendicatioune virgeluecht, virun allem de Sujet Kafkraaft soll hei dominéieren. Gëschter Nomëtteg war dann nach de MEDEF, d'Gewerkschaft vun den Entreprisen, beim Barnier an huet sech bereet gewisen iwwer eng Steiererhéijung fir grouss Entreprisen ze diskutéieren.
Gewerkschaft CGT rifft zum Streik op
Haut da kéint et méi Tensioune ginn. D'Sophie Binet vun der lénker Gewerkschaft CGT ass de Moien am Matignon a wëllt de Barnier iwwerzeegen, d'Reform vun der Assurance-Chômage net nees opzegräifen. De leschte Premier Gabriel Attal hat dës Reform wéinst den Neiwalen op Äis geluecht. Och wëllt d'CGT keng einfach Upassunge vun der ëmstriddener Pensiounsreform, wéi se de Barnier proposéiert, mee datt dës komplett zeréckgezu gëtt, esou d'Sophie Binet e Méindeg op Franceinfo.
Well de Barnier de Pensiounsalter net nees vu 64 op 62 erofsetze wëllt, huet d'CGT opgeruff den 1. Oktober ze streiken. Haut a muer kommen dann och nach déi aner grouss Sozialpartner fir eng Entrevue an de Matignon.