Et géife vill Knackpunkte ginn, een dovunner wier, datt een net weider kënnt mat der Fuerderung a Saachen CDA. Si wëllen als Centre de développement et d'attraction gläichgestallt gi mat Dikrech, Ettelbréck an Ierpeldeng-Sauer. De Statut vum CDA bréngt Suen. Mam Vott gëschter ass Bettenduerf aus dem Nordstadprojet eraus, seet de Bettenduerfer Buergermeeschter Patrick Mergen am Tageblatt.
Déi aner Gemengen halen um Projet fest
De Buergermeeschter vun Ierpeldeng-Sauer Claude Gleis seet am 100,7-Interview hie wier relativ iwwerrascht iwwer déi Decisioun. D'Schäfferéit aus den anere Gemenge wëllen awer um Projet festhalen. Et géifen och schonn Aarbechtsgruppen dru schaffen an anerer géife gläich ufänken.
Wéi geet et elo weider, bleiwen déi aner 4 Gemengen dobäi datt si wëlle fusionéieren, dat hu mir de Moien de President vum Syndikat Nordstad gefrot:
"Do sinn dann elo eebe keng Leit méi vu Bettenduerf derbäi, mee déi aner véier Gemenge sollen do weiderschaffen. Déi Timeline, déi mer gestëmmt hunn, déi steet nach ëmmer an d'Zäit drängt."
Léon Gloden: CDAe kënnen net einfach sou verdeelt ginn
Den Inneminister Léon Gloden bedauert d’Decisioun vum Bettenduerfer Gemengerot, fir net méi Deel vun der Nordstadfusioun ze sinn. Et kéint een de Gemengen d‘CDAen „net einfach sou verdeelen“, dofir mussen d‘Gemenge verschidde Krittären erfëllen. Soss géif et geschwë méi CDAe ginn, wéi Gemengen, esou den Inneminister.
Dem Léon Gloden no géif bis elo alles drop hindeiten, datt d’Nord-Stad-Fusioun dann ouni d’Gemeng Bettenduerf, mee mat Dikrech, Ettelbréck, Ierpeldeng a Schieren zustane kënnt.