Et wier eng Prioritéit vum Gläichstellung-Ministère d'Verbreedung vun de Gender-Stereotyppen ze evitéieren, seet d'Ministerin Taina Bofferding. Virun allem bei de Jonke wéilt een usetzen, an deementspriechend hätt een och d'Moyene gewielt.
Zum Beispill gouf eng Homepage lancéiert, www.rockmega.lu, déi sech spezifesch u méi e jonke Public riicht. Zesumme mat enger Studentin hätt een eng Broschür ausgeschafft, also vu Jonke fir Jonker, an et géif een iwwer déi sozial Medie Videoen diffuséieren.
Eng pedagogesch Camionnette
En anert Outil dat ausgeschafft gouf ass de MEGA Jumper, eng pedagogesch Camionnette, mat där de Ministère an d'Schoulen, op Jugendtreffpunkten oder Festivalle fiert, fir do a Kontakt mat de Jonken ze kommen. An dat wier e Schwéierpunkt vun der Strategie, seet d'Ministerin.
"Bei de Stereotyppe wëlle mer déi Jonk mat Situatioune konfrontéieren, fir si zum Nodenken ze bréngen an datt si esou vläicht selwer erkennen, datt si sech och mol vu Virurteeler leede loossen. Wa mer an der Egalitéit gäre virukommen, ass et wichteg bei de Jonken unzesetzen an hinnen d'Valeur vun der Egalitéit ze vermëttelen a virzeliewen."
Nieft der Aarbecht um Terrain wier d'Fuerschung en zweete Schwéierpunkt am Ministère fir d'Gläichstellung tëschent Fra a Mann, an dofir géif ee mat der Uni Lëtzebuerg zesummeschaffen. Et géif hei spezifesch ëm d'Rollen- a Geschlechter-Stereotyppe goen, seet d'Taina Bofferding.
Iwwer Stereotyppe fuerschen
Duerno wéilt een d'Resultater aus dëser Fuerschung verwennen, fir an Zukunft nei Projeten auszeschaffen. Et géif een am Ministère mierken, datt sech Stereotyppen nach ëmmer am Zesummeliewen hale géifen an dofir wier et wichteg ze wëssen, firwat sech esou Virurteeler an der Gesellschaft festsetzen, fir an enger zweeter Etapp Strategien dogéint ze entwéckelen.
Infoen iwwer d'Campagne We are equal an d'Broschüre mam selwechten Numm fënnt een ënner www.mega.public.lu