Vanishing Twin Komesch Téin an Texturen aus dem Nuetsgaart

D'Band "Vanishing Twin" ass schonn ëmmer zimmlech mysteriéis gewiescht. An op hirem neie Wierk "Ookii Gekkou" reest de gelungene Quartett vu London weider Richtung Terra incognita. Méi Jazz wéi soss, méi experimentell, méi gewot, duerfir awer net ouni Groove. Dëse Sonndeg spille se hei zu Lëtzebuerg an de Rotonden. Den Jamie Reinert huet sech am Virfeld mat der Frontfra Cathy Lucas ënnerhalen.

Jamie Reinert / tt

Vanishing Twin (Arthur Sajas).jpg
Foto: Arthur Sajas

"Ookii Gekkou" heescht "grousse Mound" op japanesch. An deen neie "Vanishing Twin" Album straalt déi enigmatesch Kraaft vun dësem Objet am Stärenhimmel och aus. E Pandemie-Album, deen déi friem, einsam a Sci-Fi Ambiance vun der Kris erëmspigelt. Eng Kollektioun vu Biller a Gefiller, déi een an de Gaart an der Nuecht versetzt. Do huet dann och Band wärend dem Lockdown zu London vill Zäit verbruecht.

"Et ass en zimmlech mageschen, verzauberten Uert. Mat exotesche Beem mat renge Stämm an Äscht a ville grénge Planzen. Dat war Deel vun der Inspiratioun fir dësen Album. Wann ech un e grousse Mound denken, dann denken ech un dee Gaart an der Nuecht."

Vum Quintett zum Quartett

Zanter 2015 flitt "Vanishing Twin" musikalesch duerch de Kosmos. Hire psychedelesche Sound gräift vill obskuer Sourcen op. Ob et déi atonal Kompositioune vum Sun Ra sinn oder d'Film-Musek vum Piero Umiliani, bleiwen d'60er a 70er eng Haaptreferenz. Mat "Ookii Gekkou" ass "Vanishing Twin" och elo kee Quintett méi, mee e Quartett. De Flüttist a Perkussionist Elliott Arndt ass net méi dobäi, wat awer net nëmmen e Verloscht war.

"Net laang nodeems hien d'Band verlooss huet si mer op Tour gaangen an hunn decidéiert hien net ze ersetzen, mee als Quartett weiderzefueren. Déi Ännerung ass wierklech interessant gewiescht. Jiddereen ass méi exposéiert, et kann ee sech néierens verstoppen. Mir tendéieren elo och manner ze jammen, spille méi präzis a fokusséiert."

D'Batterie Spillerin Valentina Magaletti huet emol hir Bandmemberen als dysfunktional Genien beschriwwen. Si selwer ameséiert sech mat fräi an Jazz-gedriwwe Grooves. De Phil M.F.U. huet eng Passioun fir obskuer Samples a verspillte Kläng an de Bassist "Susumu Mukai" interesséiert sech fir méi ongewéinlech Harmonien. Eng Oppenheet punkto Musek an experimentéieren, déi e Sonndeg op der Bün an de Rotonden nawell spannend kéint ginn.

"Jidderee vun eis ass gläichzäiteg e Generalist a Spezialist op interessant Manéieren. Mir sinn all obsedéiert mat Musek a lauschteren e breede Spektrum u Saachen. Dat bënnt eis wierklech zesummen. Och wa mer eis net iwwer alles eens sinn, gëtt et e Kär Grupp Aflëss déi eis wichteg sinn. Dat ass wat "Vanishing Twin" un d'Rulle bréngt."

An der Mediathéik:

Musek Aktuell / / Jamie Reinert
Lauschteren

Méi zum Thema

black_sea_dahu_2021_1_land.jpg
Black Sea Dahu an der Kulturfabrik

Den Dahu ass ee Fabelwiesen aus de Schwäizer Bierger. Och Black Sea Dahu si fabelhaft, a Schwäizer, mee ee schwaarzt Mier ass hir Musek net... oder net ëmmer.

18-08-19 719Sessa (Foto Helena Wolfenson)
Sessa

"Eng poetesch Distraktioun fir d'Häerz méi liicht ze maachen", esou kéint een d'Musek vum Sessa definéieren. E Gittarist a Sänger vu São Paulo, deen haut den Owend an der Kulturfabrik spillt.

The Jesus and Mary Chain
The Jesus and Mary Chain am Atelier

An de spéiden 80er Jore hunn "The Jesus and Mary Chain" als Enfants terribles gegollt. Den 21. November, e Sonndeg an enger Woch, sinn déi schottesch Indie-Legenden am Atelier zu Besuch.

Hand Habits
Hand Habits - Fun House

Ënn Oktober koum den drëtte Longplayer "Fun House" vun Hand Habits eraus. Et ass e Volltreffer, net just fir d'Fans vum handgemaachten an éierlechen Indierock.

 

Net verpassen

Programm

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen