Musek Eng musikalesch Psychoanalys fir eise Géigewaartsmalaise

Den Avantpop-Trio Virginia Wing presentéiert sech op "private LIFE" chaotesch a verspillt. Deen neien Album ass d'Resultat vun enger musikalescher Gruppentherapie a féiert déif eran an d'Séileliewe vun de Bandmemberen.

Max Tholl / cz

Virginia Wing

Et passt natierlech en Album "private LIFE" ze nennen an enger Zäit, an där dat ëffentlecht Liewe quasi stëll steet an den Alldag sech an der Isolatioun vun den eegene véier Maueren ofspillt. Mee hire mëttlerweil véierten Album wëlle Virgina Wing awer net als Pandemiedokumentatioun verstane wëssen. D'Iddi an d'Konzept wiere scho virum Virus do gewiescht, seet d'Sängerin Alice Merida Richards. Et ass sécherlech e Krisenalbum, mee et geet hei ëm déi emotional a ganz perséinlech Erausfuerderungen, déi och viru Corona den Alldag begleet hunn. Si hätt ugefaangen um Album ze schreiwen, wéi se sech keng Therapiestonne méi leeschte konnt, sot d'Frontfra kierzlech an engem Interview. Wéi de Bandtrio erkläert, ass "private LIFE" d'Resultat vun enger Zort musikalescher Gruppentherapie, an där een zwar keng komplett Heelung gesicht mee e bëssi Séilefridde fonnt huet. Schonn den éischte Song vum Album ass net nëmmen ee verzweiwelte Ruff no Hëllef, mee och eng Manifestatioun vun Hoffnung, sech genee un dës klameren ze kënnen.

Wat "private LIFE" auszeechent, ass d'Wiesselspill mat den Emotiounen. Sou düster an bläischwéier d'Lyrics och deelweis sinn, ginn si a waarm an iwwerdréinten Avantpop-Texturen gewéckelt, wouduerch sech eng perfekt Balance aus Chaos an Harmonie duerch den Album zitt. D'Frontfra Alice Merida Richards seet, et wier besonnesch bei sou eeschte Gefiller och wichteg mol mat Humor oder Liichtegkeet ze reagéieren. Hier Songs bezeechent d'Sängerin als Trauma an engem wierklech gudden Outfit.

Kommunikatioun vs. technesch Perfektioun

Virginia Wing presentéieren sech op hirem neien Album esou chaotesch a verspillt, datt et mat Zäite schwéier fält, den Iwwerbléck ze behalen. De Sam Pillay beschreift de Sound vu senger Band als Analogie zum Chaos vum eegene Liewen an dem Selbstbewosstsinn eben op wackelege Been ze stoen. Op "private LIFE" kollabéieren Drums, Synthlines an Soundfragmenter aneneen a ginn duerch de Spriechgesang vum Richards ënnerluecht, deen e Stéck wäit un d'Kënschtlerinne Laurie Anderson oder Vivien Goldman erënnert. Wéi d'Richards erkläert, huet hiren Trademarkgesang e ganz konkrete Grond. Si wier net déi technesch perfekt Sängerin a wéilt och léiwer d'Kommunikatioun an de Fokus stellen, ewéi eng Meeschterleeschtung vun hire Stëmmbänner. Och markant um Album ass de Saxophon vum Christopher Duffin, dee schonn um leschten Album als Museker vertruede war, mee elo aus dem Manchester Indieduo een Trio gemaach huet.

D'Schéinheet an der Däischtert

"private LIFE" ass eng musikalesch Psychoanalys fir eis Géigewaartsmalaise. Virginia Wing setzen do un, wou all de Stress an d'Angschtgefiller hierkommen a wou sech och Verlaangen an Hoffnung kënne breet maachen. Goung et um leschten Album "Ecstatic Arrow" - den Numm verréit et schonn - ëm d'Kraaft vun der Extase, analyséiert den neien Disk wat mir alleng an der Däischtert maachen. "private LIFE", schreift d'Band an engem Statement, mécht engem Dier wäit op, fir se dann direkt nees hannert engem zouzeschloen. Den Album ass awer keng klaustrophobesch Listening experience mee demonstréiert vill méi wei vill Schéinheet an der Däischtert ze fannen ass.

An der Mediathéik:

Album vun der Woch / / Max Tholl
Lauschteren

Méi zum Thema

verocai.jpg
SAMPLE VUN DER WOCH

30 Joer laang duecht den Arthur Verocai, säin Album wier ee Flopp gewiescht. Bis zum Joer 2000: Beatmaker wéi de Madlib an MF Doom hunn den Album zu neiem Liewen erwächt. Eise Sample vun der Woch.

Rome Aircheck-Session
Live-Musek

Den Neo-Folk Museker Jérôme Reuter gëtt en Abléck a säin neien Album "Parlez-Vous Hate?". Dëse Samschdeg um 17 Auer spillt Rome eng Aircheck-Session. De Concert gëtt um 100,7 aus der Kulturfabrik iwwerdroen.

Programm

Net verpassen

  • 17.4. Riicht eraus: Claude Mangen

    Claude Mangen

    E Bléck an d'Vergaangenheet, an d'Aktualitéit an op d'Zukunft vum Kultursecteur zu Lëtzebuerg mam Direkter vum Mierscher Kulturhaus a President vun der Theaterfederatioun.

Dossieren

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

  • Déi eeleft Editioun vum LuxFilmFest

    Trotz Pandemie gëtt de Luxembourg City Filmfestival organiséiert. Déi 11. Editioun (4.-14. Mäerz) kritt dëst Joer awer eng liicht aner Nues: Filmer ginn deels am Kino deels online gewisen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen