William Doyle - Great Spans of Muddy Time Ee Wierk vu Kontraster

Als East India Youth huet hie Mëtt den 2000er a sengem Studio IDM, Pop an Ambient-Musek kaleidoskopesch gekräizt. Zanterhier verëffentlecht hien och ënner sengem eegene Numm Musek. Dem Englänner William Doyle säin neit Wierk bitt nees eklektesch Pop-Musek tëschent syntheetesch an organesch. Awer vläicht liicht manner verschafft. "Great Spans of Muddy Time" ass eisen Album vun der Woch.

Jamie Reinert / cbi

William Doyle - Great Spans of Muddy Time
Foto: Ryan MacPhail

"Great Spans of Muddy Time" ass dem Ongléck ze verdanken. E Klangperfektionist krut eng hei op den Deckel. Wiem ass et net scho passéiert. En Harddisk, deen de Geescht opgëtt. Am William Doyle sengem Fall huet dat de Verloscht vu sëllege Opnamspuere bedeit. Glécklecherweis hat hien awer als Toun-experiment seng Klangkonstrukter duerch e Kassetterekorder lafe gelooss an opgeholl.

Eng villschichteg Plack

D'Audioqualitéit vun der Kassette war natierlech net esou geleckt wéi aus dem Laptop, a Verschiddenes konnt och net méi geännert oder weiderverschafft ginn. Esou war dëse manéierlechen Englänner gezwonge säi pedantesche Filter auszeschalten. En huet sech misse mam Zoufall an der Ongenauegkeet zefridde stellen. E Wiessel, deen an dësem Fall eng Beräicherung mat sech bruecht huet.

Et dauscht, knuppt a souert ganz agreabel op "Great Spans of Muddy Time". D'Elektronik ass lieweg a verspillt. Grondleeënd huet de William Doyle sech net geännert. En huet just eng weider Dimensioun vu senger Expressivitéit entdeckt. Méi séier schaffen, manner iwwerschaffen. Doduerch héiert sech seng nei Plack och ganz villschichteg un.

Vu réien experimentelle Konstrukter iwwer fréijoerlecher Ambient-Musek bis hin zu Synth-Pop à la Soft Cell. Vill Terrain gëtt gedeckt an ëmgegruewen. De Gaart ass hei och méi wéi eng Metapher. Den Titel vum Album ass dem populären engleschen Gärtner Monty Don ze verdanken, deen Depressioun als "Great Spans of Muddy Time" beschriwwen huet. Éiweg a matscheg ass dem dem William Doyle seng Plack allerdéngs net. Trotz méi réier Methodologie bleift seng Visioun fokusséiert a ronn.

Elegant an bal epesch

Dem William Doyle seng Stëmm war nach ni esou present am Mix wéi hei. E glëtscht ganz elegant a bal epesch vu Nout op Nout, weist e Selbstvertrauen, op déi ee ganz direkt usprécht. Seng Musek inspiréiert sech eegenen Aussoen un eegewëllegen englesche Museker wéi de Robert Wyatt, Brian Eno, Robyn Hitchcock a Syd Barrett. Mat Eleganz zitt hien duerch dës englesch musikalesch Landschaften, direkt oder indirekt a léisst d'Téin fir sech schwätzen.

Dystopesch Visioune vu kierperlecher Erweiderung oder och de Chaos am Kapp vu manipuléierte Matbierger a Krisenzäite sinn Theemen, déi vertount ginn. Mee et geet och méi abstrakt, méi duuss hir. En Album, deen tëscht dem mysteriéisen Ënnergrond an de Feinverzweigunge vun der Iwwerfläch pendelt. "Great Spans of Muddy Time" ass e Wierk vu Kontraster, dat den Zeitgeist festhält, an déi eng oder aner Revelatioun mat sech bréngt.


An der Mediathéik:

Album vun der Woch / / Jamie Reinert
Lauschteren

Méi zum Thema

Bernice (Colin Medley).jpg
Bernice

Den experimentelle Pop Quintett huet schonn ëmmer eng eegen Zopp gekacht. Op hirer neier Plack "Eau de Bonjourno" gëtt genuddelt, gelaacht a sech erfrëschend chaotesch manifestéiert. E Gespréich mat der Bandleaderin Robin Dann.

Slowthai
SLOWTHAI

Dem Enfant Terrible vum britteschen Hip-Hop seng vulgär awer poetesch Manéier fir ze rappe kënnt net just a UK gutt un. Am Februar huet de brittesche Rapper Slowthai säin neien Album erausbruecht.

Programm

  • Notturno

  • On air

    Vu 6 bis 10

  • Vun 10 bis 2

  • Vun 10 bis 2

  • Resonanzen

Net verpassen

  • Annonce: Recherche d'un chef de la programmation

    Gebai vum radio 100,7

    L'Etablissement de Radiodiffusion Socioculturelle, opérateur de la radio de service public radio 100,7, recherche 1 chef de la programmation (m/f) pour contrat à durée indéterminée et à temps plein.

Dossieren

  • Déi eeleft Editioun vum LuxFilmFest

    Trotz Pandemie gëtt de Luxembourg City Filmfestival organiséiert. Déi 11. Editioun (4.-14. Mäerz) kritt dëst Joer awer eng liicht aner Nues: Filmer ginn deels am Kino deels online gewisen.

  • Drogen a Mënschen

    Zanterdeem et d'Mënschheet gëtt, hunn Droge si begleet. Haut hu vill Drogen e schlechte Ruff. Wisou ass dat esou a wat misst geschéien, fir besser iwwer eventuell Risike beim Konsum opzeklären?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen