Live-Vertounung vu Stommfilmer, dat ass d'Spezialitéit vum Carl Davis. Zanter bal 30 Joer kënnt den amerikaneschen Dirigent a Komponist op Lëtzebuerg, fir mam OPL ze schaffen. Dëst Joer feiert hie säin 80. Gebuertsdag. A senger Carrière huet hie schonn alles vertount, vu Komedien iwwer Western, vun historesche Filmer bis Libesgeschichten. Dobäi war et him ëmmer wichteg, eng Diversitéit ze hunn.
"Technesch bréngt all Film déi selwecht Erausfuerderung: Dir hutt den Orchester an et ass live, sou wéi dat bis 1928 oder 29 an de Kinoe gemaach gouf.Mäin Job ass et, d’Musek ze schreiwen, z'arrangéieren an duerfir ze suergen, datt se mam Film synchroniséiert ass. Also datt et sech sou ufillt, datt d’Musek dem Film hëlleft, an zum Film gehéiert. Wa mir richteg gutt a Form sinn, da vergësst de Publikum d’Musek. Dann zitt si e regelrecht an de Film eran."
The Gold Rush
Bei der Live Cinema Editioun 2016 steet den 19. an 20. Mäerz dem Charlie Chaplin säi "Gold Rush" op der Affiche. D'Komedie erzielt iwwert Goldgriewer am Klondyke am Joer 1898. De Personnage vum Charlie erlieft dobäi allerhand spannend a geféierlech Zeenen. Vill dovunner an enger Hütt am Schnéistuerm, déi iergendwann iwwert dem Ofgrond hänkt
"Natierlech wësse mir, datt et eng Komedie ass, an datt d’Leit wäerte laachen. Mä de Film leeft ëmmer weider, an ech kann net waarde bis d’Leit fäerdeg gelaacht hunn. Ech si connectéiert mam Film: soubal en ufänkt, da sinn ech de Sklav vum Film."
Fir d’Musek fir bei The Gold Rush konnt de Carl Davis op Melodien zeréckgräifen, déi den Charlie Chaplin selwer 1942 komponéiert hat. 15 Joer no der Originalversioun vum Stommfilm hat hien d'Wierk iwwerschafft, nei montéiert an eng Art Voix-Off dropgesat. D'Versioun vum Davis orientéiert sech awer nees un der Stommfilm-Versioun.
Dem Charlie seng Mënschlechkeet
De Carl Davis verstoppt hien net, datt hien e grousse Fan vum Chaplin ass: "Ech fannen, hien huet déi meeschten Déift. Et kann ee jo soen, de Lloyd ass méi witzeg, an de Keaton ass méi gelungen, an och extrem witzeg. An natierlech sinn si all erstaunlech Athleten an Turner, déi onheemlech geféierlech Saache maachen. Mä den Charlie huet eng Mënschlechkeet wéi kee vun deenen aneren zwee. Wann een den Charlie kuckt, dann erkennt een eppes an him erëm: hie versicht um einfachsten Niveau z'iwwerliewen."