Faites vos jeux - rien ne va plus. Weder den Atelier, nach d'Bands a Kënschtler kënnen drop hoffen, an der momentaner Kris hir Revenuen oprecht ze erhalen. Mee dorëms geet et net. "Mir wëllen d'Hollerecher Strooss einfach erëm opspären a virsiichteg éischt Schrëtt maachen", esou de Michel Welter.
Op der Affiche sti bis Dezember de Stand-Up-Comedian Serdar Somuncu, déi fantastesch Hania Rani vu Warschau, de Chassol, déi Däitsch Pagan Folk Band Faun, de Stéphane Eicher, de Lëtzebuerger Jazz-Crossover Projet Klein, Glass Museum an déi belsch Trip-Hop Formatioun Hooverphonic.
Déi selwecht Experienz
Op de Concerten ass de Mask obligatoresch, et muss een eng Sëtzplaz reservéieren, sech un d'Signalisatioun halen an an der Entrée gëtt Féiwer gemooss. "Et gëtt sécher net esou ganz déi onbeschwéiert Concerts-Experienz, déi mir gewinnt sinn, mee dat, wat aus den Hautparleure kënnt an op der Bün passéiert, ass déi selwecht Qualitéit wéi gewinnt", esou de Programmchef vum Atelier.
D'Concerten hunn um Site ee klenge Logo mat der Mentioun "Intimate Shows". Hei kann een och wéi gewinnt seng Plaze reservéieren. D'Modalitéite sinn op der Facebook-Säit vum Atelier ze fannen.