Field Music - Flat White Moon Agängeg Melodien a stramm Grooves

Hir Musek ass bis an de leschten Detail arrangéiert a mat sëllege Stëmmharmonië bestéckt, ouni dobäi iwwerlueden ze kléngen. Field Music si scho bal 20 Joer ënnerwee an op hirem neien Album "Flat White Moon" liwweren déi zwee Bridder vun Nord-England nees vill agängeg Melodien a stramm Grooves.

Jamie Reinert / cbi

Field Music
Foto: Christopher Owens

"Mir bewältegen eis Experienzen, andeems mer Lidder driwwer schreiwen", esou den David Brewis vu Field Music. 2018 war fir hien a säi Brudder en traumatescht Joer. Hir Mamm ass gestuerwen an hire Studio, an deem si néng Joer laang geschafft hunn gouf ofgerappt.

No zwou Placken, déi sech mam Brexit-Referendum, respektiv d'Nowierkunge vum éischte Weltkrich beschäftegt hunn, war elo Zäit fir dëse Verloscht vun 2018 musikalesch unzegoen, ze verschaffen. Net op eng düster, melancholesch Manéier, éischter de Géigendeel.

Field Music kléngen am Verglach zu den zwee leschten Alben e bësse manner konzeptuell, e bësse manner zerebral. D'Gittar ass nees méi am Virdergrond an hire Groove ass vun Hoffnung a Liewensfreed duerchzunn.

De Gebridder Brewis hir éischt grouss musikalesch Léifte kommen op "Flat White Moon" schéin zum Virschäin. "When You Last Heard From Linda" erënnert mam rhythméierte Sträicherarrangement un Eleanor Rigby Beatles. Déi knackeg Batterie a schaarf Leadgiuitar-Kläng op "Out of the Frame" a "Meant To Be" féieren den Heritage vu Led Zeppelin a Free virun, a Fleetwood Mac verstoppt sech hannert all deene agängege Melodien, den diverse 70er-Studio-Kläng.

Dem Prince säi Funk stécht an hirer Bass a Gittar Philosophie. D'Arrangementer sinn, wéi ee sech vu Field Music erwaart, verspillt a verschnörkelt. Stëmmharmonien gi grouss opgestapelt, iwwerraschend Wiessel an ongewéinlech Kombinatiounen halen ee mat Genoss bei der Staang. Éierlech gesot gëtt et op "Flat White Moon" kee schlecht Lidd. Déi zwielef Stécker si vu vir bis hannen duerchduecht, mee bleiwen trotz vill Gekniwwels mat zwee Féiss um Buedem.


"Mir wëllen, datt d'Leit sech gutt fillen iwwer Saachen, iwwert déi mir eis schrecklech fillen", esou de Mantra vum neie Field Music-Album. E Wierk iwwer Trauer, dat der Negativitéit aus dem Wee geet, ouni se dobäi komplett auszeblennen.

Field Music hunn nees e méi direkt a perséinlecht Wierk op d'Bee gesat, wou een nees eng breet Palette u Stëmmungen erëmfënnt. Vu Rock op Chamber-Pop, frontal op méi impressionistesch Approchen. Hiert Zesummespill trëfft weiderhin déi perfekt Balance tëscht intuitiv a kniwweleg. Déi zwee wësse sech an hirem neie Studio ze ameséieren. An d'Freed zesummen ze musizéieren schéngt nach laang net ausgeleiert ze sinn.


An der Mediathéik:

Album vun der Woch / / Jamie Reinert
Lauschteren

Méi zum Thema

Orions Belte
Album vun der Woch: Dräi Stären, an eng global Visioun vu Musek

"Musek, déi d'Liewe méi einfach mécht" liest een an de YouTube-Commentairen bei engem Video vun den Norweger Orions Belte - an et hätt ee Loscht mat ze ënnerschreiwen. Der Band hiren zweeten Album "Villa Amorini" ass eisen Album vun der Woch.

Dry Cleaning
Dry Cleaning - New Long Leg

D'Post-Punk-Formatioun Dry Cleaning liwwert mat "New Long Leg" e wonnerschéi skurrilt Pandemie-Dokument, dat op onerwaarte Plaze geet. En Abléck an déi gro Matière vun enger gelungener a ganz Band.

Programm

Net verpassen

Dossieren

  • Déi national Anti-Krise-Pläng an der EU

    Wat maachen d'Länner mat den Suen, déi hinnen aus dem Europäeschen Fonds de Relance zoustinn? An eiser Rubrik Europa Aktuell huele mer déi national Pläng ënner d'Lupe.

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen