CinEast-Festival Wat am äermsten EU-Memberstaat alles schif leeft

Déi bulgaresch Flicke sinn net besser wéi déi bulgaresch Gesellschaft - dat ass de Message vu ''Rounds'', enger dramatescher Komedie vum Stephan Komandarev. De Michel Delage huet dee Film um CinEast-Festival gesinn.

Michel Delage

Filmkritik Rounds
Eng laang Nuecht waart op d'Flicke vu Sofia (Foto: Viktor Kozhuharov)

Fir sech e preziist Bild vun enger Gesellschaft kënnen ze maachen, schwätzt een am beschte mat engem Taxichauffer, heescht et. Oder mat engem Polizist. Wie sech iwwer den Zoustand vun der bulgarescher Gesellschaft wëllT informéieren, dee kann dem Stephan Komandarev seng Filmer kucken.

Virun dräi Joer hat de Komandarev a senger dramatescher Komedie "Directions'' sechs Taxichaufferen duerch déi bulgaresch Haaptstad Sofia geschéckt. D'Resultat, eng herrlech batterbéis Satir, war an der offizieller Kompetitioun vum CinEast-Festival 2017 gelaf. Dëst Joer krut een um Festival dem Stephan Komandarev säin neie Film "Rounds" zerwéiert, dee souwuel inhaltlech wéi och formell un "Directions" uknäppt.

Soziale Panorama

"Rounds'' erzielt d'Geschicht vun dräi Police-Patrullen, déi an där selwechter Nuecht duerch Sofia fueren an, am Prinzip, fir Recht an Uerdnung solle suergen. Duerch hir Ae kritt ee mat, wat a Bulgarien, deem äermsten EU-Memberstaat, alles esou schif leeft. Dat geet vun éischter méi harmlosen Delikter wéi Graffitien, iwwer Passanten, déi ouni Grond vun Neonazien op der Strooss zerschloen ginn, bis hin zu de katastrophale Bedéngungen an engem Altersheem, dem Trafic mat Flüchtlingen oder nach der Korruptioun.

Stilistesch iwwerhëlt "Rounds'' déi selwecht Elementer wéi de Virgänger "Directions'', also laang Plan séquencen, déi mat enger Handkamera gefilmt sinn an deem Ganzen en dokumentaresche Charakter ginn.

Déi sechs Polizisten, déi am Film portraitéiert ginn, gehéiere wuel net all zu deenen hellste Stären um Himmel. Si reiden sech an absurd Situatiounen eran a ginn Dialogen zum Beschten, déi wonnerbar domm a witzeg sinn - wat net verhënnert, datt se net och alt emol e Fonke Wourecht duerchklénge loossen. Zum Beispill wann am Gespréich tëschent engem pro-EU an engem pro-Russland Flic festgestallt gëtt, datt d'Europäesch Unioun deenen allermeeschte Bulgaren um materielle Plang näischt bruecht huet.

D'Flicke sinn net besser wéi de Rescht vun der Gesellschaft

Deen een oder anere Polizist ass wuel kaum vun de Kriminellen ze ënnerscheeden, déi si am Prinzip solle joen. Déi bulgaresch Police ass eben net besser oder méi schlecht wéi de Rescht vun der bulgarescher Gesellschaft, esou de Message vum Film.

Grad wéi de Gros vun der Populatioun mussen och d'Poliziste mat extrem niddrege Léin auskommen, fir eng Aarbecht ze leeschten, déi wéineg bis keng sozial Unerkennung genéisst obwuel se grad esou penibel ass wéi soss anzwousch. Wann net esouguer e bësse méi: An enger schockanter Zeen gëtt eng Polizistin vun engem korrupte Politiker humiliéiert, well si sech weigert, een A zouzedrécken ...

Dierf ee sech da wonneren, datt déi Flicken hir Aarbecht net mat iwwerdriwwenem Äifer maachen an allem aus dem Wee ginn, wat ze vill Kappzerbrieches oder Iwwerstonne ka provozéieren? Schwaarzen Humor ass net dee schlechtste Wee, fir dës Realitéit ze vermëttelen, zum Beispill mat deem hilarante Running gag, an deem d'Läich vun engem Drogenofhängegen op der Grenz tëschent zwee Bezierker méi wéi eemol am Laf der Nuecht deplacéiert gëtt, fir déi waarm Gromper un d'Kolleege weiderzeginn ...

Trilogie

"Rounds" ass wéi d'Liewen och: duerchwuess, chaotesch, witzeg, traureg, dramatesch. De Film trëfft ee perfekt Gläichgewiicht tëschent Eescht an Humor an de Portrait vun de Polizisten ass nuancéiert. Gewise ginn all Zorte vun Individuen, déi Guddes wéi Schlechtes kënne maachen.

"Rounds" ass iwweregens den zweete Volet vun enger Trilogie iwwer de sozialen Zoustand vu Bulgarien an der EU, déi de Stephan Komandarev mat engem drëtte Film iwwer Ambulanciere wëllt ofschléissen. Et dierf ee gespaant sinn.


"Rounds" ass nach wärend deenen nächsten zwou Wochen online um Site vum CinEast-Festival ze gesinn.

An der Mediathéik:

Kultur / / Michel Delage
Lauschteren

Méi zum Thema

Otto Filmkritik
CinEast-Festival

Wéi erliewe Jugendlecher hautdesdaags de Suicide an den Deuil? De sensibele rumäneschen Drama ''Otto the Barbarian'' léisst bewosst vill Froen onbeäntwert. Kompetitioun CinEast-Festival.

Spiral Filmkritik
CinEast-Festival

Déi ungaresch-rumänesch Produktioun "Spiral" vun der Cecília Felméri weist, datt d'Mënsche sech net einfach de Gesetzer vun der Natur kënnen iwwerloossen. Aus der Kompetitioun vum CinEast-Festival.

Samuel Skyva a Samuel Polakovic Filmkritik
CinEast-Festival

Subversiv Aktivitéiten an engem Seminaire ënner dem Kommunismus: den Drama "Servants" vum Slowak Ivan Ostrochovsky beandrockt net nëmmen duerch seng Bildästheetik. Kompetitioun CinEast-Festival.

Father - Otac Filmkritik
CinEast-Festival

En aarmen Doléiner kämpft ëm d'Garde vu senge Kanner. De serbeschen Drama "Father" ass eng Bestandsopnam vum desastréise sozio-ekonomeschen Zoustand vu Serbien. Aus der Kompetitioun vum CinEast-Festival.

Charlatan Filmkritik
CinEast-Festival

De populären tschecheschen Heilpraktiker Jan Mikolasek geréit an d'Viséier vun de Kommunisten. ''Charlatan'' ass en zolitte Biopic vun der renomméierter polnescher Regisseurin Agnieszka Holland.

MARE_still_6.png Filmkritik
CinEast-Festival

Den Drama ''Mare'' vun der Kroatin Andrea Staka erzielt d'Geschicht vun enger frustréierter Hausfra déi versicht, der Alldagsroutine ze entkommen. Aus der Kompetitioun vum CinEast-Festival.

Stories from the chestnut woods Filmkritik
CinEast-Festival

D'Ëmbrëch op der italieenesch-jugoslawescher Grenz nom Zweete Weltkrich ware fir vill Mënschen d'Enn vun enger Welt. Dovun erzielt de slowenesche Film "Stories from the chestnut woods''.

Willow Filmkritik
CinEast-Festival

Dräi Fraen an hir Schwieregkeeten, fir schwanger ze ginn. Dat ass de Sujet vum Milcho Manchevski sengem neie Film "Willow". Um CinEast lafen dräi Wierker vum mazedonesche Realisateur.

Drita'' vum Daniel Kruglikov Filmkritik
CinEast-Festival

Kann den Zyklus vun der Vendetta gebrach ginn? De kosovaresch-amerikaneschen Drama ''Drita'' vum Daniel Kruglikov ass e strengt, poetescht Wierk. Aus der Kompetitioun vum CinEast-Festival.

Programm

Net verpassen

  • Am Gespréich: Marc Angel a Samuel Hamen

    Marc Angel, Samuel Hamen

    Zwou Generatioune vu Kënschtler hu sech zesummegedoen, fir eng originell hybrid Form ze schafen.

    Mir ënnerhalen eis mam Zeechner a Schrëftsteller an der Woch vum 23.11. méindes bis freides um 12:40 a sonndes um 10:10

Dossieren

  • CinEast-Festival 2020

    De CinEast-Festival weist eng Selektioun vu mëttel- an osteuropäesche Filmer. Déi 13. Editioun ass wéinst der Covid-Pandemie eng hybrid: d'Filmer gi souwuel um groussen Ecran wéi och online gewisen.

  • AutorInne-Lies

    D'Publikatioun PM 19 10 huet d'Valerija Berdi inspiréiert fir déi akustesch Athmospär fir d'Buch ze liwweren. Hatt huet sech dofir op de Wee gemaacht an eng ganz Rei Andréck bei Autorinnen an Auteuren doheem akustesch agefaangen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen