Sooner.lu Loosst déi béis Geeschter dach mat Rou!

De brittesche Moyen-métrage ''Host'' vum jonke Rob Savage ass en originellen, mat wéinege Mëttele gebastelten Horrorfilm, deen d'Illusioune vun der Online-Kommunikatioun entlarvt.

Michel Delage

Host
Dat war et wuel mat der Jux-Ambiance: Zeen aus ''Host''

Eng hallef Dose Frëndinnen ''treffe'' sech wärend dem Confinement op der Chat-Plattform Zoom. No lässegem Geschwätz bei engem Glieschen Alkohol steet eng Spiritismus-Seance um Programm. Zu deem Zweck gouf eng Medium engagéiert, déi genee schéngt ze wëssen, wéi een den Drot zu de Geeschter vu verstuerwene Bekannte kann hierstellen. Leider huet d'Fra vergiess ze preziséieren, datt een dëse Kontakt mat der Welt vum Iwwernatierleche besser net op déi liicht Schëller hëlt: dat kéint op eemol déi béis Geeschter aus der Reserve lackelen.

Wéi hie sech virun engem gudde Joer mat senge Kolleegen e klenge Spaass erlaabt an hinnen iwwer Zoom mat geeschterhafte Kreaturen Angscht gemaach hat, konnt sech de jonke Britt Rob Savage e virale Succès op de soziale Medie sécheren. Firwat déi Iddi also net och zu engem Moyen-métrage vun enger Stënnchen ausbauen ? D'Resultat ass en erstaunleche klengen Horrorfilm mam Titel ''Host''.

Found footage

De Grupp vu Jugendlechen oder jonken Erwuessenen, déi zum Spaass mam Feier spillen an dofir systematesch bestrooft ginn, ass e klasseschen Ënnergenre, deen hei op eng originell Manéier variéiert gëtt. Ëmsou méi interessant ass d'Aart a Weis, wéi de Realisateur aus enger gezwongener Situatioun - de Film gouf wärend der Covid-Pandemie gedréint - dat ganzt Potential ausnotzt.

''Host'' funktionéiert nom Prinzip vum ''found footage'', dat heescht, datt en exklusiv aus Biller zesumme gesat ass, déi bannent der Handlung entstane sinn. An deem heite Fall filme sech d'Protagonisten all selwer via Laptop- oder Handyskamera. Déi realistesch Wierkung ass ëmsou méi effikass, datt vill Leit déi Zort vu Kommunikatiounstechnologie am vergaangene Joer kennegeléiert hunn a sech ouni Problem kënnen identifizéieren.

Online-''Communautéit''

E gudde Sënn fir Rhythmus a Spannung; dat suggestiivt Spill mat Stéierungen an Decalagen am Internet-Reseau; de spuersamen Asaz vu soss Schock- a Spezialeffekter; an Acteuren, déi relativ credibel vun enger labberer Jux-Ambiance an total Panik erarutschen, dat alles mécht dréit zur gudder Qualitéit vun ''Host'' bäi.

E Film, deen déi soi-disant ''Communautéit'' vun Online-Chatter als dat entlarvt, wat se grondsätzlech ass : nämlech eng Illusioun. Wann et wierklech drop ukënnt, si mer schéin eleng.

An der Mediathéik:

Kultur / / Michel Delage
Lauschteren

Méi zum Thema

De Sergio Chamy kritt e geheimen Optrag
Nei am Kino

Den originellen chileeneschen Documentaire "The Mole Agent" (El Agente topo) vun der Maite Alberdi benotzt en detektiveschen Dispositif fir den Alter an d'Elengsinn ze thematiséieren.

Carey Mulligan.png
Grousse Kino

Mat fragille Frae beschäftege mer eis dës Woch am Grousse Kino: "Promising young woman", "Becoming Mona" an de Film noir-Klassiker "Gilda".

The Serpent.jpg Seriekritik
Netflix

"The Serpent" ass eng atmosphäresch bedréckend BBC-Fiktioun iwwer e Seriekiller, deen an den 1970er Jore westlech Touristen ausgeraibert an ëmbruecht hat. Bei wäitem net perfekt, mee léisst sech kucken.

Programm

Net verpassen

Dossieren

  • Déi national Anti-Krise-Pläng an der EU

    Wat maachen d'Länner mat den Suen, déi hinnen aus dem Europäeschen Fonds de Relance zoustinn? An eiser Rubrik Europa Aktuell huele mer déi national Pläng ënner d'Lupe.

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen