Annexe 2022 Konscht op Weenercher

Module 3 - Section B ass dem Paul Kirps seng artistesch Ausernanersetzung mat senger Faszinatioun fir Archiven. Et ass ee Wierk wat de Spectateur dozou invitéiert duerch säin eegene Virwëtz an d'Welt vum Konschtstockage anzedauchen.

Ben Kobs / tt

Module 3 - Section B

Module 3 - Section B heescht déi nei Installatioun vum Paul Kirps, déi grad op der Brillplaz zu Esch ausgestallt gëtt. Wéi den Titel schonn undeit, behandelt de Lëtzebuerger Kënschtler an dësem Wierk rëm ee vu senge Leitmotiver: d'Archivéierung.

D'Installatioun an der Annexe 2022 ass relativ simpel gehalen: de Kënschtler huet dräi Platteweenercher mat Illustratiounen, Fotoen, an diversen aneren Objete bepak. Mee grad an dëser Simplicitéit läit laut dem Paul Kirps d'Stäerkt vum Wierk. De Visiteur gëtt dozou agelueden, seng eegen Interpretatioun ze fannen.

"Wat ech am Fong wollt weisen, ass en État deen a sech bei Ausstellungen net sou heefeg ass. Dat heescht, et ass villäicht eppes wat méi op de Montage an op den Demontage vun enger Expo hiweist, an och déi Etappe virdrun an duerno. An u sech net d'Expo selwer opgräift."

"Hei richt et och"

Mat Module 3 - Section B réanalyséiert de Paul Kirps och säin eegent Wierk. Nieft Wierker aus sengem Privatarchiv huet de Kënschtler bei der Installatioun och mat Materialien a Prozesser geschafft, déi fir hien ongewinnt waren, wéi zum Beispill Sperrholz.

De Bléck hanner d'Kulisse vun der Konschtwelt, deen engem d'Installatioun gewäert, gewënnt virun allem wärend der Pandemie u Relevanz. Am leschte Joer war de Groussdeel vun der Konscht am Lager confinéiert. De Bildschierm huet d'Billerrumm ersat an Online-Expoen sinn ëmmer méi heefeg ginn. De Paul Kirps bedauert dës physesch Distanz tëscht dem Mënsch an der Konscht:

"Ech hu léiwer sou eng Ausstellung. Hei richt et och. Et richt no UV-Tënt. An all déi Saachen, dat fannen ech immens wichteg. D'Holz huet e Geroch, de Plexi huet e Geroch, d'Reflexiounen. A virun allen Denge kann een dat hei selwer entdecken. Dat heescht, wann een ronderëm déi Oeuvren geet huet ee verschidde Momenter, déi kann een sech selwer raussichen: dat si Reflektiounen, dat si Saachen, déi ee kann entdecken."

Den Titel vum Wierk - Module 3 - Section B - erënnert net just un d'Organisatiounssystemer vu Bibliothéiken an Archiven, mee léisst dem Kënschtler Spillraum fir weider Experimentatioun mat dësem Format.

An der Mediathéik:

Kultur / / Kerstin Thalau
Lauschteren

Méi zum Thema

WaterWalls
WaterWalls Festival

De WaterWalls Festival zu Esch-Sauer leeft zanter dem 17. Juli: hei sti Konscht a Kultur am Zeeche vun der Economie circulaire. De Ben Kobs war sech de Festival am Naturpark ukucken.

"Time 0"
Expo

De Paul Kirps konfrontéiert sech mat enger Technik, mat där net alles virauszeplangen ass: dem Polaroid. D'Ausstellung "Time 0" am Neimënster setzt sech mam Stadliewen an der Technik auserneen.

 

Net verpassen

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen