Zu Miersch am Literaturarchiv kann ee bis Enn Abrëll d'nächst Joer antauchen an eng ganz eegenaarteg, facettëräich, chaotesch an zugläich systematesch ugeluechten Ausstellung: Si heescht "Jean Delvaux - im Schatten der Sphinx".
Gewise gi Kënschtlerbicher an Aarbechte vum Jean Delvaux, deen déi lescht 15 Joer kontinuéierlech u sengem Wierk geschafft huet. An dee mat Collagen - mat am eenzelen dacks onwäertvolle Stécker Pabeier, awer och mat Fotoen, Timberen, Schrëft a Bildstécker, Skizzen an Duerstellungen - e ganz eegen Universum opgebaut huet, deen ee selwer muss erliewen, fir e faassen ze kënnen.
Erënneren a conservéieren
Och Literatur fléisst am Jean Delvaux säi Wierk an. Fir de Claude Conter, Direkter vum Centre national de littérature, gehéiere Kënschtlerbicher, wéi dem Jean Delvaux seng, ganz kloer am Literaturarchiv ausgestallt. Et géif ëm d'Iddi vun der Conservatioun, vum Archivage a vum Sammele goen. "Alles Begrëffer, déi zentral Aufgaben an engem Archiv benennen", esou de Claude Conter.
Dës Praktike wieren zentral an der Konschtkonzeptioun vum Jean Delvaux. Am Kënschtler senger Virstellung hätten d'Erënneren an d'Conservéieren eng fundamental Bedeitung, fënnt den Direkter vum CNL. "Andeems de Jean Delvaux privat Fotoen, Ticketen, Timberen, Rechnungen, Dokumenter, al Bicher, Pabeieren, Obelisken, Globussen, geometresch Kierperen, Booter a villes aneres op Floumäert opkeeft, entzitt hie se dem Vergiessen."
Wunderkammer
Am Zentrum vun der Ausstellung steet d'Sammele selwer. Dem Jean Delvaux seng Konschtbicher sinn dem Claude Conter no Collagen, déi d'Archivpraxis reflektéieren. Den Ausgankspunkt wier d'Praxis vum Sammelen.
Wichteg am Jean Delvaux senger Aarbecht ass de Verglach - doduerch kann een eng Uerdnung schafen an eng Sammlung zesummestellen. Duerch de Verglach - an dësem Fall mat der Technik vun der Collage realiséiert - kréien déi nach esou onwäertvoll eenzel Elementer, mat deenen den Artist schafft, en anere Wäert. De Claude Conter benotzt dofir de Begrëff vun der Wunderkammer: Mat deem Begrëff goufen an der Spéitrenaissance an am Barock d'Sammlunge bezeechnen, déi Objete mat ganz ënnerschiddlechen Originnen zesummebruecht hunn. Et ware Cabinets de curiosités.
CNL-Archivbote als Katalog
Fir d'Ausstellung "Im Schatten der Sphinx" huet de CNL e Katalog erausbruecht, deen am beschte Sënn vum Wuert aus der Rei danzt: En ass net klassesch gebonnen, mee presentéiert sech an der Form vum Archivbote vum CNL: Am A3-Dageszeitungsformat, opgedeelt an déi fënnef thematesch Beräicher vum Jean Delvaux sengen Aarbechten - a mat Texter vun der Angelika Thomé. Dat Ganzt op engem Hannergrond, deen dem Jean Delvaux seng Collagen a Kënschtlerbicher reflektéiert: Immens faarweg, villfälteg, villschichteg,villsäiteg, ebe Jean Delvaux.
D'Ausstellung "Im Schatten der Sphinx" ass nach bis de 28.04.2017 am Centre national de littérature ze gesinn.