Matthias Lehmann, Parallel Déi zwee Liewe vum Karl Kling

A sengem Wierk "Parallel" erzielt den däitschen Zeechner Matthias Lehmann d'Geschicht vum Karl Kling, deen als schwule Mann an der Nokrichszäit gezwongen ass, en Duebelliewen ze féieren.

Jeff Thoss / tt

b6f9d1fd15a038ece00a35c16a6eac614bc929f4.jpg

Iwwer 450 Säiten zeechent de Matthias Lehmann a senger Graphic Novel Parallel d'Liewe vum Karl Kling oder, besser gesot, seng zwee Liewen. Den Held kënnt aus dem zweete Weltkrich zeréck, gëtt bestuet, kritt e Kand, schafft an enger Fabrick a geet mat sengen Aarbechtskolleegen no Feierowend op den Tour.

Am Konflikt mat Gesetz a Famill

Dat ass, virum Hannergrond vun Opbau a Wirtschaftswonner, en typesche Liewenslaf aus der däitscher Nokrichszäit. Mee de Karl Kling huet ebe parallel dozou nach en anert Liewen. Hien ass heemlech schwul, trëfft sech mat anere Männer um Séi oder am Park a geréit dowéinst net nëmme mam Gesetz a Konflikt - Homosexualitéit war an Däitschland bis 1994 strofbar -, mee och mat senger Famill.

De Karl gëtt gescheet, fänkt an der DDR en neit Liewen un, grënnt eng nei Famill a kënnt zeréck an de Westen, mee och dës Kéier kann hie seng zwee Liewen net matenee verbannen. Säin Alldag ass weiderhi gekennzeechent vu Emotiounen, déi hien net weise kann, a vu Wënsch, déi hien net ausschwätze kann. Bis an de Pensiounsalter huet de Protagonist d'Gefill, sech viru senge Matmënsche verstoppen ze mussen, a schummt sech dofir, datt hien net där soi-disant Normalitéit entsprécht, déi si him virliewen.

Parallel erzielt eng ergräifend Geschicht, allerdéngs eng, déi engem wuel bekannt virkënnt. Geschichten iwwer d'Situatioun vu Leit, déi hir Homosexualitéit net oppen ausliewe konnten, iwwer spéit Comingoutten, goufen am Kino, an der Literatur an och am Comic déi lescht Joren net wéineg erzielt. An och de Setting vu Parallel, d'däitsch Nokrichszäit mat der Deelung an Ost a West, ass grad an der Graphic Novel vill thematiséiert ginn.

Eng bekannte Geschicht mat engem neien Aspekt

Déi éischt Fro, déi sech beim Matthias Lehmann sengem Buch stellt, ass also, ob et dem Zeechner gelongen ass, sengem Theema nei, originell Facetten ofzegewannen. Dat kann ee virsiichteg mat Jo beäntwerten. Sécherlech huet ee vill Zeene vum Comic an änlecher Form schonn eng Kéier gesinn, mee besonnesch ass fir d'éischt emol den Aarbechtermilieu, an dem d'Handlung spillt.

De Matthias Lehmann weist dësen oft als en oppressive Milieu, wou d'Definitioun vu Männlechkeet eng ganz enk ass, wou et essentiell ass, e "richtege Mann" ze sinn, a wou een ëmmer an enger dicht gestréckter Männergesellschaft ënnerwee ass, där hir Memberen sech e bestëmmt Verhale praktesch géigesäiteg opzwéngen. Et ass awer net esou, datt de Karl Kling déi ganzen Zäit ënner deem Ëmfeld leit. Hie genéisst och d'Komerodschaft ënner den Aarbechter an ass stolz dorop zu deenen ze gehéieren, déi d'Land nom Krich erëm opbauen.

Och an anere Liewensberäicher verhält sech den Held ambivalent. D'Familljeliewe mat Fra a Kand a Reienhaus ass fir hie net just eng Fassad, hanner där e seng eigentlech Identitéit verstoppe kann. De Karl wëll dat alles, hie wëll d'Normalitéit, mee e wëll eben och aus hir ausbriechen. Dat mécht d'Tragedie vu senger Geschicht aus, bei där hien um Enn weder dat eent nach dat anert wierklech kann hunn an an engem Dilemma gefaange bleift.

An der Mediathéik:

Lauschteren

Méi zum Thema

Jean-Paul Maes.jpg
Jean-Paul Maes - Rehaugen

A sengem éischte Roman mam Titel "Rehaugen" beschreift de Lëtzebuerger Theaterauteur, Theaterregisseur a Schauspiller Jean-Paul Maes op eng ganz intimistesch Manéier de Versuch vum Coming Out vun engem Familljepapp.

Madeleine Résistance
Gezeechent

D'Liewen vun der Resistenzlerin Madeleine Riffaud erzielen de Jean-David Morvan an Dominique Bertail an dräi Bicher. An "La Rose dégoupillée" geet et ëm hire Wee an d'Résistance, dee scho fréi virgezeechent ass, awer laang brauch, bis e Wierklechkeet gëtt.

Pflaumenregen
"Pflaumenregen" vum Stephan Thome

In seinem neuen Roman "Pflaumenregen" nimmt Stephan Thome seine Leser in seine Wahlheimat Taiwan. Sein Roman richtet den Blick auf eine Nation, die Ziel von variablen politischen Interessen ist.

Jason Lutes - Berlin
Graphic Novel Classics

Den Jason Lutes erzielt a sengem Graphic Novel "Berlin" d'Schicksal vu ronn zwanzeg verschiddene Leit aus ganz ënnerschiddleche Quartieren a Milieue vun der däitscher Haaptstad.

 

Net verpassen

Programm

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen