De Man Booker Prize gëtt et zënter 1969. Et ass ee vun den héchst dotéierte Literaturpräisser am engleschsproochege Raum. Zënter dem leschte Joer ass d'Literaturkritikerin Gaby Wood Directrice vun der Man Booker Foundation. Wéi ass de Fonctionnement vun esou engem Präis a wien entscheet iwwer de Gewënner? Doriwwer huet si mam Jürgen Boos, dem Direkter vun der Frankfurter Buchmesse diskutéiert.
D'Gaby Wood huet als Directrice littéraire wuel Afloss, awer net all Muecht iwwer de Man Booker Prize. Iwwer hir stéingen d'Trustees, hir Cheffen, huet d'Literaturkritikerin preziséiert. Dat kéinte Politiker, Schrëftsteller oder zum Beispill Journaliste sinn. Dernieft gëtt et den Advisory Committee, deen d'Gaby Wood presidéiert.
De Jury
Der Gaby Wood hir Roll ass déi, fir de Jury vum Man Booker Prize zesummenzesetzen, deen all Joer erneiert gëtt. Fréier wieren d'Memberen esou gewielt ginn, datt si gutt fir d'Publicty wieren. Haut wier dat anescht, betount d'Gaby Wood. Dacks hätten d'Leit scho vergiess wien am Jury gesiess hätt, wann de Laureat bis bekannt gemaach gi wier. "Mee wie si als Lieser sinn ass wichteg fir d'Selection vun de potentielle Gewënnerbicher."
An den Ufanksjoren waren d'Jurye vum Man Booker Prize vu Leit aus dem literareschen an akademeschem Liewe besat: Der Gaby Wood hire Virgänger Ion Trewin huet awer schonn eng Preferenz fir e Jury mat Memberen aus ënnerschiddleche gesellschaftleche Beräicher gewisen. Hien huet zum Beispill Politiker oder Acteure mat an de Jury geholl. Och d'Gaby Wood fënnt, datt een am Jury sollt Mënsche mat ganz ënnerschiddlechen Hannergrënn hunn.
Allerdéngs géif et lues a lues schwéier ginn, fir Jurymemberen ze fannen – eleng wéinst der Zuel u Bicher, déi si misste liesen, bedauert d'Literaturkritikerin. 2016 wieren 155 Romaner agereecht ginn an déi goufen all vun der Jury ënnert d'Lupp geholl. "Dat ass ee Buch den Dag an där Zäit déi virgesinn ass. Vill Auteure wëlle guer nët esou vill Bicher liesen."
Groussen Impakt
Fir d'Laureate vum Man Booker Prize huet dëse Präis eng grouss Bedeitung, betount d'Gaby Wood. Den Impakt wier schonn dann enorm, wann e Buch et op d'Shortlist vum Präis gepackt hätt. De Man Booker Prize hätt een internationalen Effet an d'Relatiounen, déi doduerch entstéingen, géifen dem Auteur méi bréngen, wéi de Präis fir een éischt priméiert Buch.
Der Directrice vum Man Booker Prize ass awer net nëmmen dëse Präis vu Bedeitung. SI ass der Meenung, datt et net genuch Literaturpräisser kéint ginn. Si géife Suen ënnert d'Auteure bréngen, an déi kéinten esou besser schaffen.
Ëm Literaturpräisser geet et och am nächste LiteraturLabo de 7. Dezember um 19:00 an der Kapell vun der Abtei Neimënster. Bei der Diskussioun kënnt Dir live derbäi sinn: Reservéiert Är Plazen op events@100komma7.lu