15 Prozent manner Energieverbrauch Wéi wäit sinn d'EU-Länner mat de Spuerpläng?

Den Energieverbrauch soll an der EU tëschent dem 1. August 2022 an dem 31. Mäerz 2023 ëm 15 Prozent reduzéiert ginn - dat haten d'EU-Länner haut virun enger Woch am Accord mat dem Virschlag vun der EU-Kommissioun decidéiert. Spuenien huet gëschter scho konkret Mesure beschloss, zu Lëtzebuerg soll dat eréischt am September de Fall sinn.

Tom Haas / sam

E Gebai an der Nuecht mat de Luuchten un
Och ëffentlech Gebaier sollen Energie spueren. Foto: Vitor Paladini / Unsplash

Lauschteren


A Spuenien huet d'Regierung gëschter, also pünktlech fir den EU-Plang, e Pak u Moossnamen decidéiert, an ass mat sengem Spuerplang europawäit Virreider.

Spuenien huet scho konkret Mesuren decidéiert

D'Mesure gesinn ënner anerem vir, datt ëffentlech Gebaier net méi ënner 27 Grad däerfe gekillt ginn am Summer. Am Wanter däerfen se net op méi wéi 19 Grad gehëtzt ginn - dat gëllt och fir Hoteller, Kinoen, Grande Surfacen an Aarbechtsplaze generell.

Och wat d'Beliichtung ugeet, ginn et a Spuenie kloer Reegelen: Ab 22h00 Auer nuets mussen d'Luuchten aus sinn - a Büroen, a Vitrinne vu Geschäfter a vun Denkmaler.

Déi Reegele musse bannent enger Woch ëmgesat ginn a gëlle bis de November 2023. Et wier un der Zäit, solidaresch ze sinn, sot déi zoustänneg Ministerin fir ekologesch Wandel, Teresa Ribera.

Lëtzebuerg schafft u Circulairen a Webinar

Och d'Regierung zu Lëtzebuerg lancéiert eng national Strategie fir den Energie-Verbrauch ze reduzéieren, mee wéineg Konkretes stoung an dem Communiqué, deen den Energieminister Claude Turmes gëschter un d'Noriichteredaktioune vum Land verschéckt huet.

Fir Energie an den ëffentleche Gebaier ze spueren, wier een am Gaangen, Uweisungen ze entwéckelen, déi dann an engem Circulaire solle verschéckt ginn. Fir d'Gemenge gëllt dat selwecht, och hei gëtt e Circulaire mat Spuermoossname verschéckt.

Iwwerdeem soll et e Webinar ginn, fir iwwer déi national Campagne an d'Mesuren ze informéieren - dat awer eréischt den 8. September, also méi wéi ee Mount, nodeem déi europäesch Länner sollten ufänken ze spueren. D'Oppositioun hat rezent scho kritiséiert, datt deen Zäitpunkt ze spéit wier.

Italien ass och scho méi wäit

Déi meescht EU-Länner hunn hir Spuerpläng nach net verëffentlecht oder als Gesetz gestëmmt.

Anerersäits huet Italien schonn am Mee Reegele fir d'Klimaanlagen agefouert an e Gasspuerplang an d'Weeër geleet, fir vu russeschem Gas bis 2024 onofhängeg ze ginn. Dowéinst mussen d'Italiener hiren Energieverbrauch och nach just ëm 7 Prozent reduzéieren, fir dem EU-Plang gerecht ze ginn.

Méi zum Thema

Gasmeter
Experten-Avis

De Spuer-Plang mat deem dëse Wanter an der EU 15 Prozent manner Gas soll verbraucht ginn, suergt fir Diskussiounen. Experte stelle sech Froen iwwer d'Exceptiounen an d'Derogatiounen am Plang.

Net verpassen

Programm

Dossieren

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

  • Dossier: Cannabis-Legalisatioun

    Nach am Laf vun dësem Joer soll e legale Kader ausgeschafft ginn, fir e staatlech kontrolléierten Ubau vu Cannabis fir medezinesch Zwecker zu Lëtzebuerg méiglech ze maachen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen