Verfassungsreform: Wat ännert sech am Justiz-Kapitel?
Am Oktober hat d'Chamber fir en Deel vun der Verfassungsreform gestëmmt. Bis den 20. Dezember hunn ageschriwwe Wieler nach Zäit, fir ee Referendum anzefuerderen. Wat ännert sech am neien Text genee?
Duerch d'Ännerungen am Justiz-Kapitel vun der Verfassung Land soll d'Onofhängegkeet vun der Justiz gestäerkt ginn.
Den neien Text seet, datt de Parquet a sengen Enquêten a Plainte fräi ass, woubäi de Justizministère d'Zoustännegkeet vun der strofrechtlecher Politik huet. Duerch dës Ännerunge soll den Afloss vun der Exekutive op d'Justiz ageschränkt ginn.
Eng weider Neierung ass d'Schafe vun engem nationale Justiz-Rot. Domat soll d'Transparenz gestäerkt ginn. Am Conseil national de la Justice si Riichter, respektiv Vertrieder vum Parquet a Vertrieder vun der Zivilgesellschaft. Si sollen iwwer de Justizapparat a seng Onofhängegkeet waachen.
Déi drëtt gréisser Ännerung ass, datt d'Verfassungsgeriicht weider Zoustännegkeete kritt. Duerch e Vott mat Zwee-Drëttel-Majoritéit kann d'Chamber an Zukunft dem Verfassungsgeriicht weider Zoustännegkeeten zougestoen.
Kënnt et zu engem Referendum?
Et ass am Prinzip virgesinn, datt d'Chamber Ufank d'nächst Joer iwwer d'Verfassungsännerung ofstëmmt. D'Parlament hat den 20. Oktober schonn an engem éischte Vott majoritär dofir gestëmmt. Wa bis den 20. Dezember méi wéi 25.000 Wieler e Referendum afuerderen, gëtt den zweete Vott an der Chamber duerch e Referendum ersat.
An den nächste fënnef Wochen decidéiert sech, ob et e Referendum iwwer d'Verfassungsännerungen iwwer d'Justiz gëtt. Bis den 20. Dezember kënnen d'Wieler mat hirer Ënnerschrëft e Referendum iwwer d'Justiz-Kapitel afuerderen. D'Lëschte leien an de Gemengen aus.
Dono solle weider Verfassungs-Kapitele moderniséiert ginn. Dobäi geet et ëm d'Staatsform an de Roll vum Groussherzog an d'Reliounen, d'Chamber an de Staatsrot, souwéi Rechter a Fräiheeten.
Méi zum Thema
Demande fir e Referendum ka vun haut un ënnerschriwwe ginn
Vun haut u kann op der Gemeng d'Demande fir ee Referendum iwwer d'Verfassungsreform ënnerschriwwe ginn. 25.000 Ënnerschrëfte si bis den 20. Dezember néideg. Ee vun den Organisateure weist sech zouversiichtlech.
CSV wäert Prozedur fir Referendum net declenchéieren
D'CSV wäert kee Referendum iwwer d'Verfassungsreform declenchéieren, esou de Michel Wolter am 100,7-Interview. Déi ëffentlech Petitioun fir e Referendum krut um Enn 18.579 elektronesch Ënnerschrëften.
Verfassungsännerungen: Wéi kann et zu engem Referendum kommen?
Eng ëffentlech Petitioun fir e Verfassungsreferendum wäert an der Chamber debattéiert ginn, d'Parteie wäerte sech nach eemol zur Fro musse positionéieren. Ee Referendum kéint vum Parlament a vu Bierger declenchéiert ginn.
