Covid-Gesetz Staatsrot an CCHD äussere Bedenken

De Covid-Zertifikat géif riskéieren Ongläichheeten ze verschäerfen. Dat schreift déi consultativ Mënscherechtskommissioun an hirem Avis iwwer dat neit Covid-Gesetz. Och de Staatsrot äussert änlech Bedenken.

Pierre Reyland / cbi

Conseil d'état
De Staatsrot äussert Bedenken zum Covid-Gesetz. Foto: Kaori Anne Jolliffe (Archiv)

Lauschteren


Déi zwou Instanze begréisse prinzipiell, datt d'Leit nees Fräiheete sollen zeréckkréien, elo, wou déi epidemiologesch Situatioun sech verbessert huet. De Staatsrot konstatéiert awer: am HORECA an am ëffentleche Beräich géif et grouss Ouverturë ginn.

Am private Beräich wieren d'Limitatiounen am Verglach nach streng. Dësen Ënnerscheed an Agrëff vun der Regierung an d'Privatliewe vun de Leit wier ëmmer méi schwéier ze rechtfäerdegen. Den digitale Covid-Zertifikat géif vill Froen opwerfen, sou déi zwou Instanzen. An der EU soll e jo den 1. Juli soll a Kraaft trieden.

Inegalitéite kéinte verschäerft ginn

De Gesetzestext fënnt d'CCDH net koherent a schlecht lieserlech. D'Regierung hätt dee potentiellen Impakt vum Covid-Zertifikat op d'Mënscherechter net am Detail analyséiert a misst dat nohuelen.

D'CCDH hätt zum Beispill Informatiounen, datt vill Leit a prekäre Situatiounen an der Impfstrategie net en compte geholl gi wieren an elo riskéieren, duerch d'Netz ze falen. D'Inegalitéite kéinten der CCDH no och verschäerft ginn, well eng vun den Alternativen zur Impfung - also de negativen Test - deen engem och Fräiheeten zeréck ka ginn - net automatesch a fir jiddweree gratis ass.

Weider konstatéiert d'CCDH, datt de Covid-Check ageféiert soll ginn zu engem Zäitpunkt, wou eng grouss Zuel vu Leit nach net konnte geimpft ginn.

Onkloerheet bei Strofen

Déi consultativ Mënscherechtskommissioun an de Staatsrot hiewen och ervir: Bei der Méiglechkeet, datt geimpften oder geheelte Persounen awer anerer nach kënnen ustiechen, géif et nach ëmmer kee wëssenschaftleche Konsens. Dofir freet d'CCDH sech och, firwat geimpften oder geheelte Leit vun enger Quarantän sollen ausgeschloss ginn.

Wat déi obligatoresch Tester fir d'Personal am Fleege- a Gesondheets-Secteur ugeet, kritiséieren de Staatsrot an d'CCDH, datt et juristesch a besonnesch aarbechtsrechtlech net kloer wier, wat geschitt, wann eng Persoun esou en Test refuséiert.

Betreffend Strofen huet de Staatsrot och eng formell Oppositioun: an zwar am Fall wou en HORECA-Betrib oder en anerer Organisateur vun engem Event sech fir de Covid-Check entscheet huet. Si musse garantéiere, datt den Check respektéiert gëtt, wann net, si Strofe virgesinn - och fir d'Leit, déi sech do net un d'Reegelen halen. Dat wier awer net kloer forméiert, an de Staatsrot huet eng Alternativ proposéiert.

Méi zum Thema

Marc Fischbach
Covid-Gesetz

D'COPAS ass prinzipiell averstane mat der geplangter Testflicht fir d'Personal an den Alters- a Fleegeheemer. Dat géif awer eng Rei Erausfuerderunge mat sech bréngen, seet de Marc Fischbach.

Paulette Lenert a Xavier Bettel
Lockerungen

D'Situatioun wier am Moment ënner Kontroll, sou de Premier Xavier Bettel de Mëtteg um Briefing nom Regierungsrot. All d'Parametere géifen an déi richteg Richtung weisen an d'Impfung géifen däitlech hir Wierkung weisen.

Programm

Net verpassen

  • De radio 100,7 sicht Redakteren/Animateuren

    radio 100,7

    De radio 100,7 sicht fir seng Magasinn-Redaktioun 1 Redakter/Animateur (m/w) 20 St/W (CDD 1 Joer)
    an 1 Redakter/Animateur (m/w) 40 St/W (CDI) fir direkt ze engagéieren.

Dossieren

  • Déi national Anti-Krise-Pläng an der EU

    Wat maachen d'Länner mat den Suen, déi hinnen aus dem Europäeschen Fonds de Relance zoustinn? An eiser Rubrik Europa Aktuell huele mer déi national Pläng ënner d'Lupe.

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen