Corona-Pandemie Projektioun: Bis zu 1.400 Neiinfektioune den Dag

Ouni ee "gesellschaftlechen Effort" géifen d'Fallzuele bis Mëtt November staark klammen, prognostizéiert d'Covid-19-Task-Force. Da stéing dem Gesondheetssystem am Dezember eng schwéier Kris bevir.

Pia Oppel

Statistiken zur Corona-Pandemie
Symbolbild. Foto: Bigstock / vectorfusionart

Bis zu 1.400 Nei-Infektioune pro Dag kéinten erreecht ginn, wa sech um Verhale vun de Leit näischt ännert. Dovunner geet déi wëssenschaftlech Covid-19-Task-Force an hirer neier Analys vun der Pandemie-Entwécklung hei am Land aus. An hirer leschter Analys vum 19. Oktober hat d'Task Force nach mat maximal 370 nei Fäll pro Dag fir Mëtt Dezember gerechent.

Net mat considéréiert goufe bei den aktualiséierte Projektioune déi nei sanitär Restriktiounen, déi d'Regierung annoncéiert huet.

Kris am Gesondheetssystem

An hirer Analys warnt d'Task-Force: Ouni ee strikte Respekt vun den Hygiènesreegelen an eng Reduktioun vun de soziale Kontakter, kéint déi aktuell Situatioun zu enger "schwéierer Kris am Gesondheetssystem" féieren. Dëst besonnesch, wann den Trend vun Infektioune bei eelere Leit géif virugoen. Eng Prognos, mat wéi villen Hospitalisatiounen iwwer déi nächst Wochen ze rechnen ass, liwweren d'WëssenschaftlerInnen net.

De Reproduktiounstaux ass bannent enger Woch vun 1,3 op 1,6 geklommen: Mëttlerweil stécht eng Covid-positiv Persoun an der Moyenne 1,6 aner Leit un.

Epidemie nees ënner Kontroll kréien

D'Verduebelungszäit ass iwwer déi lescht Woche konstant erofgaangen: Mëttlerweil verduebelen déi deeglech Infektiounszuele sech all véier Deeg. Virun enger Woch louch deen Indicateur nach bei 5,5 Deeg. Dëst deit drop, datt de Virus sech den Ament exponentiell ausbreet: D'WëssenschaftlerInne schwätze vun engem "verstäerkt exponentielle Verhalen" - am Géigesaz zu engem lineare Wuesstum kann dëst bannent kuerzer Zäit zu engem ganz staarke Wuesstum vun de Fallzuele féieren.

Datt d'Situatioun de WëssenschaftlerInnen no schonn elo net méi ënner Kontroll ass, geet just indirekt aus der Analys ervir: Hei heescht et, datt de Respekt vun den Hygiènesmesuren essentiell wier, fir "d'Epidemie nees an een Zoustand ze bréngen, deen e ka kontrolléieren."

Méi zum Thema

Ministère de la Santé
Corona-Pandemie

Wann ee positiv op de Coronavirus getest gëtt, soll ee sech selwer isoléieren - an net op een Appel vun der Santé waarden. Dat selwecht gëlt fir d'Quarantaine nom Kontakt mat enger Covid-positiver Persoun.

Jean-Claude Schmit Riicht Eraus
Corona-Pandemie

Den Direkter vun der Santé hält déi nei sanitär Restriktioune fir eng "raisonnabel Approche". De Jean-Claude Schmit schléisst trotzdeem weider Upassungen net aus.

Statistiken zur Corona-Pandemie
Coronavirus

Der Covid-Taskforce no ass d'Entwécklung vun der Corona-Epidemie op engem kritesche Punkt ukomm: et wier ze fäerten, datt de Verlaf geschwënn net méi ze kontrolléiere wier.

Programm

Net verpassen

  • Am Gespréich: Chaild

    Chaild

    De Kënschtler iwwer säi Coming-out, seng Musekspläng a seng perséinlech Approche zur artistescher Kreatioun.

Dossieren

  • Drogen a Mënschen

    Zanterdeem et d'Mënschheet gëtt, hunn Droge si begleet. Haut hu vill Drogen e schlechte Ruff. Wisou ass dat esou a wat misst geschéien, fir besser iwwer eventuell Risike beim Konsum opzeklären?

  • Kuriositéiten aus der Lëtzebuerger Sprooch

    Si oder hatt? Zwee oder zwou? Domat oder domadder? Lëtzebuergesch ass och fir Mammesproochler net ëmmer einfach. Mir ginn der Saach op de Fong.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen