Medezin Gesellschaften am Santésberäich: Den Avant-Projet steet

Dokteren a Professioneller aus anere Gesondheetsberuffer sollen d'Erlabnes kréie sech zu Societéiten zesummenzeschléisse fir d'Käschten an d'Aarbechtslaascht an enger Praxis besser opzedeelen. De Gesondheetsministère huet dofir e Consultatiounsprozess lancéiert mat engem Avant-projet de loi, deen dem radio 100,7 virläit. D'Doktesch- an Zänndoktesch-Associatioun AMMD fuerdert scho laang, datt d'Medezinner Gesellschafte kënne grënnen. D'Iddi ass awer mat Risike verbonnen, notamment enger méi staarker Kommerzialiséierung vum Gesondheetssecteur.

Pia Oppel / cz

Illustratioun Gesondheetsberuff Medezin
Foto: Bigstock - venusvi

Déi medezinesch Beruffer sollen d'Méiglechkeet kréie sech zu zivillen oder kommerzielle Gesellschaften zesummen ze schléissen - d'selwecht wéi dat elo scho fir aner liberal Professiounen, zum Beispill d'Affekoten, de Fall ass, heescht et am Exposé des motifs.

Dat géif hëllefe fir dem Manktem u Personal am Gesondheetssecteur entgéint ze wierken, sou d'Hypothèse vum Gesondheetsministère. Och well ee sech a sou enger gemeinsamer Struktur d'Aarbechtslaascht besser kéint opdeelen.

Esou wier et an Zukunft méiglech, datt zum Beispill eng Gynécologin, eng Hiewan, ee Kiné an ee Psychotherapeut sech als Associéen zesummen dinn. De Kaf vun hirer Praxis a vun Equipementer géif iwwer hir gemeinsam Societéit lafen. An d'Societéit kéint nieft administrativem Personal och anert Gesondheetspersonal astellen, als Salariéen.

Wichteg Froe sinn nach ze klären

Eng sensibel Fro ass, wien esou Societéiten dierf grënnen. Den Avant-Projet schléisst zum Beispill aus, datt Investisseure sech bedeelegen, déi selwer kee medezinesche Beruff ausüben. Mee och Doktergesellschaften aus dem europäeschen Ausland kéinten eng Zouloossung kréien - a wien do um Kapital dierf bedeelegt sinn, gëtt am jeeweilegen Hierkonftsland gereegelt.

Wéi dës medezinesch Societéite sech um Permanence-System vun de Generalisten an un de Garden an de Spideeler bedeelegen, gëtt am Avant-Projet net gekläert: Dës wichteg Fro soll an engem groussherzogleche Reglement gereegelt ginn.

Adaptéiert medezinesch Versuergung soll iwwer e Gesetz gereegelt ginn

Wéi sech de Projet an déi aner grouss Chantiere vun der Gesondheetspolitik areit, bleift dann och nach oppen. Zum Beispill muss d'Regierung nach tranchéieren ënner wéi engen Oploe verschidden Equipementer, dorënner IRMen, baussent de Spideeler kënnen zum Asaz kommen. Den nationale Gesondheetsplang an d'Conclusioune vum Gesondheetsdësch sinn nach net do. An no wéi eng Krittären d'medezinesch Offer baussent de Spideeler prinzipiell soll gereegelt ginn, fir ze garantéieren, datt am ganze Land eng adaptéiert medezinesch Versuergung assuréiert ass - dozou zirkuléiert am Gesondheetsministère eisen Informatiounen no eng Note, déi an ee Gesetzprojet soll münden.

De Wonsch wier, datt all dës Projeten anenee gräifen, sot eis op Nofro hin den LSAP-Deputéierten a President vun der Santéskommissioun an der Chamber, Mars Di Bartolomeo.

Méi zum Thema

tiers payant
Dokteschrechnungen

Fir d'Patientevertriedung ass de PID Etikettenschwindel. D'CNS an d'AMMD verspriechen, e bitt de Patienten dat nämmlecht, wéi den Tiers payant généralisé. Mee iergendeppes muss anescht sinn, soss hätten d'Dokteren jo net zougestëmmt. Mee wat?

Maison medicale
Changementer

D'Maisons médicalen wieren "absolut net méi adaptéiert". Dat hätt sech ëmsou méi mat der Pandemie bemierkbar gemaach, esou den Direkter adjoint vun der Santé. Am September soll een an déi éischt nei Gebaier plënneren.

 

Net verpassen

Programm

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen