Chronik Pessimismus (a bëssen Optimismus) virun der Klimakonferenz

Déi wichtegst Welt-Klimakonferenz zanter Paräis am Joer 2015 fänkt dëse Sonndeg zu Glasgow, a Schottland, un. Dës Kéier geet et net méi drëms e grousst Verspriechen an e globalen Akkord ze fannen. Nee, op dëser COP26 sollen all Länner nach eng Kéier weisen, wat si genee maache wäerte fir d'Äerderwiermung ze limitéieren. Eise Korrespondent Philip Crowther ass och op der Plaz wärend dësen zwou Wochen.

Philip Crowther (Glasgow) / tt

Chronik Philip Crowther

Dës 26. Welt-Klimakonferenz fänkt net eréischt dëse Sonnden zu Glasgow un. Vläicht am wichtegsten ass dat, wat zu Roum dëse Weekend geschitt. Do kommen d'Stats- a Regierungscheffe vum G20 zesummen, déi 20 räichst Länner op der Welt. Si solle kollektive Wëlle weise fir dat grousst Versprieche vu Paräis anzehalen.

Gebremst mee net gestoppt

Dat Versprieche war fir enger Äerderwiermung vun 2 Grad Celsius par Rapport zum 19. Joerhonnert zouzesteieren, a wa méiglech 1,5 Grad Celsius als méi ambitionéiert Zil ze erreechen. Mee nei Verspriechen a konkret Pläng vun eenzele Länner an och vun der Europäescher Unioun, ginn net duer. 2,2 Grad Äerderwiermung ass den Ament méi realistesch, a passt net an d'Paräisser Klimaofkommes. D'Klimakatastroph géif esou just e bësse gebremst ginn, a sécher net gestoppt ginn.

Zu Glasgow, mee besonnesch zu Roum dëse Weekend, kënnen déi räichst Länner awer nach eng Kéier gudde Wëlle weisen. De Klimawandel soll beim G20 d'Haapttheema sinn. Méi einfach wéi bei anere Sommete wäert et dëst Joer scho sinn, wann och nëmme well d'USA nees mat um Dësch setzen, mat de Länner déi de Klimawandel eescht huelen.

Mee en Joe Biden am Plaz vun engem Donald Trump geet net duer, well en amerikanesche Plang fir am Joer 2050 klimaneutral ze sinn ass bis elo just e Plang. Déi eenzel Deeler mussen et duerch den amerikanesche Kongress packen, wou Republikaner a konservativ Demokraten där Saach am Wee stinn.

China ouni wierklech nei Pläng

Optimismus gëtt et vun amerikanescher Säit trotzdeem, zum Beispill vun den USA hirem Haaptmann a Saache Klima, dat ass de fréieren Ausseminister John Kerry. Mee och hien huet zu London gewarnt, datt et zu schreckleche Konsequenze komme kann.

D'Versprieche vu ville Länner sinn effektiv eropgeschrauft ginn, mee wann e Land wéi China net matmécht da gesäit et schwaarz aus. Gëschter huet Beijing den neie Plang virgestallt an do gëtt et näischt Neits. Klimaneutralitéit ka vu China eréischt fir 2060 erwaart ginn, méi spéit wei et d'USA an d'EU wëllen. China ass jo dat Land mat de gréissten CO2-Emissiounen.

Vläicht kann um G20-Sommet nach e bësse gudde Welle gewise ginn, soss fänkt de Klima-Sommet hei zu Glasgow mat vill Pessimismus un. Dës COP26 gëtt als lescht gutt Méiglechkeet ugesi fir d'Emissioune vun den Zäregaser méi oder manner séier kollektiv ze reduzéieren.

An der Mediathéik:

Chronik / / Philip Crowther
Lauschteren

Méi zum Thema

Carole Dieschbourg
Klimawandel

Den IPCC-Rapport ass ee kloert Alarmsignal fir d'Carole Dieschbourg. Nieft nationale Mesurë géint de Klimawandel wéilt Lëtzebuerg och bei der nächster Klimakonferenz zu Glasgow Positioun ergräifen.

Andrew Ferrone
Weltklimarapport

Am Weltklimarapport wieren d'Wëssenschaftler sech eens, datt d'Äerderwiermung integral op de Mënsch zeréckzeféieren ass, seet den Andrew Ferrone. Et wier awer nach net ze spéit fir d'Äerderwiermung ze bremsen.

Robert Vautard
IPCC-Rapport

D'Zil vu enger Äerderwiermung vu maximal 1,5 Grad Celsius kann erreecht ginn, wann elo séier gehandelt gëtt, seet de franséische Klimafuerscher Robert Vautard. Hien ass ee vun den Auteure vum neie Weltklimarapport.

 

Net verpassen

Programm

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen