Dëst Joer triede verschidde Moossnamen a Kraaft, déi eng Limitatioun vu Verpackungen an Offall viséieren.
Zanter dem éischte Januar dierfe Restauranten zum Beispill keen Eewee-Geschier méi benotzen, dat just eng Kéier ka benotzt ginn.
Fester a Liwwerdéngschter ginn och viséiert
De gréngen Deputéierten François Benoy war Rapporter vum Gesetzpak. Hien erkläert, datt Moolzechten, déi a Restauranten op der Plaz consomméiert ginn, op re-utilisabelen Telleren, Besteck, Tasen a Glieser mussen zerwéiert ginn.
Dës Moossnam, déi Eewee-Geschier viséiert, gëtt dann och ausgeweit:
"Vun 2023 un, sinn op Fester Plastikstelleren, -glieser a -besteck verbueden. Vun 2025 un, mussen all d'Behälter an d'Besteck am Take-Away a bei de Liwwerdéngschter re-utilisabel sinn."
An enger éischter Phase dierfen op de Fester an Evenementer keng Behälter fir Liewensmëttel a Gedrénks aus Plastik genotzt ginn. Vun 2025 un sinn dann och aner Matière viséiert, ausser Glas.
Keen Uebst a Geméis a Plastik vu Juli un
Fir de Verkaf vun Uebst a Geméis gëtt et dann de Stéchdatum vu Juli 2023, vun do un soll dann Uebst a Geméis ouni Plastiksverpackung presentéiert ginn.
De Paul Rasqué vum Ëmweltministère erkläert, datt ee sech heibäi u Frankräich orientéiert huet. Et hätt een och versicht, "déi Delaien esou ze wielen, datt se déi bescht méiglech Cohérence mat deem bidden, wat a Frankräich Applikatioun ass."
Zanter dem éischte Januar mussen iwwerdeem Eenzelhandelsbetriber, déi méi ewéi 400 Quadrat-Meter grouss sinn, an déi als Self-Service funktionéieren, eng Sammelplaz ubidden fir all d'Verpackungen vu Produiten, déi se verkafen.
Wéini ee Pfandsystem kënnt fir Fläschen a Béchse fir Gedrénks ass nach net gewosst, ee Reglement Grand-Ducal muss deen Datum festleeën. Den Tarif läit dann tëschent 10 Cent an engem Euro.
