An enger Reaktioun betount d'Inneministerin Taina Bofferding, datt dee Fusiounsprojet fir si wichteg bleift. Et misst een awer an där aktueller Situatioun d'Finanzkapazitéite vum Staat am A behalen. D'Fuerderunge vun de Gemenge wier dat Duebelt, wat de Staat u Subventioune pro Awunner an Awunnerin bezilt.
Finanzéierung hänkt vum pluriannuelle Budget of
Et misst ee bedenken, datt och nach aner Fusiounen ustoen, a "wann een engem sou vill gëtt, da muss ee logescherweis deem aneren och esou vill ginn", esou d'Taina Bofferding.
D'Fusioun vun de fënnef Nordstad-Gemenge wier eng aussergewéinlech Fusioun, d'Nordstad géif déi véiert géisst Gemeng am Land ginn, an déi hätt dofir "eng gewëssen Opmierksamkeet verdéngt". D'Regierung wéilt dofir kucken, wat de finanzielle Spillraum ass, deen een als Regierung dofir huet.
Eng konkret Äntwert op d'Fuerderung vun den Nordstad-Gemenge gëtt et eréischt wann déi pluriannuell Budgetsprojete vum Finanzministère bis ausgeschafft sinn, esou nach d'Taina Bofferding
Eng nei Kasär fir d'Nordstad
Bei der Fusioun vun der Nordstad stellt sech och d'Fro no enger neier Kasär fir d'Rettungsdéngschter. D'Infrastruktur zu Ettelbréck ass net méi zäitgeméiss: d'Gebai staamt aus de fréieren 80er Joren. Et ginn eng sëllege Problemer, ënner anerem d'Vestiairen, d'Duschen, d'Kanalisatiounen oder d'Raimlechkeete fir sech auszerouen. Och den Emplacement vun der Kasär ass problematesch: wéinst dem Stau ass et dacks schwiereg mat de Gefierer séier duerch de Verkéier ze kommen.
Aktuell gëtt et eng Rekrutéierungscampagne vum CGDIS, am Zenter um Rond-point Gluck an der Stad gëtt d'Formatioun assuréiert. Trotzdeem wier déi lokal Infrastruktur zu Ettelbréck weiderhi wichteg, seet de Chef vum Ettelbrécker Interventiounszenter Yves Damy.
No der Formatioun missten déi Saachen, déi geléiert goufen, och um Terrain applizéiert ginn an dofir missten dat neit Personal begleet an ënnerstëtzt ginn. Bei de Sitten zu Ettelbréck an Dikrech géif een awer ufänken "extrem un d'Enn vun eise Kapazitéiten ze sinn", esou den Yves Damy.
D'Regierung sicht no engem Site
Et wier ee sech där Problematik bewosst, esou d'Inneministerin Taina Bofferding. Et wier ee scho laang am gaangen ee Site ze sichen, "mee richteg ass et, et ass eng relativ al Kasär, an et ass och elo net nei, datt een eng nei Infrastruktur brauch". Dofir wéilt ee kucke fir Terrainen ze kréien a séier virun ze kommen, datt eng nei Kasär fir d'Nordstad gebaut ka ginn.
Wéi séier dat effektiv soll geschéien, wollt d'Inneministerin net verroden, dono misst och geplangt an nach gebaut ginn.