"All Changement bedeit e gewëssene Stress", seet de Stater Schäffe Patrick Goldschmit (DP). D'Servicer hätten awer alles am Grëff. Wann den Tram déi verlängert Streck bis fiert, gi manner Bussen an de betraffene Quartiere gebraucht. D'Gare Routière op der Gare verschwënnt. Dat war bis elo eng Haltestell, wou d'Busse konnte waarden an och dréien.
Vum 13. Dezember u gi Linnen an domat och Nummere geännert. Et wäerte manner Buslinne ginn, déi d'Gare mat der Uewerstad verbannen, einfach well den Tram dat iwwerhëlt. Elo si ronn 80 Bussen d'Stonn déi Streck gefuer, et bleiwen der 40. De Patrick Goldschmit preziséiert, datt um ganze Reseau genee esou vill Busse fuere wéi bis elo. "Mir wëllen, datt den ëffentlechen Transport gutt fonctionéiert, esou datt d'Leit eng Alternativ fir hiren Auto hunn", esou de Stater Schäffen.
Vill Informatiounen disponibel, wann néideg
Vun der nächster Woch u sinn Hostessen an Hosten op de Quaien, fir déi néideg Informatiounen ze ginn. Et gëtt och eng Onlineplattform, mat allen Infoen. "Sécher mussen d'Leit sech dru winnen, mee wann dat bis geschitt ass, ass et eng Verbesserung", verséchert de Patrick Goldschmit.