Sozialkonflikt Luxair: Robert Biever soll vermëttelen

De fréiere Procureur Général Robert Biever wäert am Sozialkonflikt bei der Luxair vermëttelen. Dee Virschlag vum President vum Luxair-Verwaltungsrot gouf de Mëtteg am Verwaltungsrot guttgeheescht. An de leschte Woche war de Sozialdialog tëscht der Luxair-Direktioun an de Personalvertrieder méi schlecht ginn.

Jean-Claude Franck / cbi

Luxair Airlines at Munich Airport
Foto: CC / Marco Verch

Lauschteren


De Luxair-Verwaltungsrot reagéiert op d'Schwieregkeete vun de Gewerkschaften a vun der Direktioun fir beieneen ze fannen: Mam Robert Biever gëtt e Mediateur agesat, deen net aus der Aviatioun, mee aus der Justiz kënnt, an de President selwer, den Giovanni Giallombardo, wäert selwer och bei de Vermëttlungsgespréicher derbäi sinn.

De Verwaltungsrot wéilt an enger konstruktiver Demarche all d'Säiten un een Dësch kréien, heescht et an engem Communiqué.

Informatioun vum Lëtzebuerger Wort stëmmt net

Weider heescht et, d'Verwaltungsrotsmemberen hätte Vertrauen an de Management an an de Generaldirekter - also och an de Gilles Feith.

Et stëmmt also net, wat d'Lëtzebuerger Wort rezent gemellt hat: d'Dageszeitung hat geschriwwen, de Gilles Feith géif d'Luxair verloosse fir Direkter vu Lux-Airport ze ginn.

Eisen Informatiounen no si bei Lux-Airport nach zwou Persounen am Rennen, an de Gilles Feith ass net drënner. D'Decisioun fir dee Poste soll geschwë falen.

Luxair huet zanter Pandemie Problemer

D'Luxair ass zanter der Covid-Pandemie an enger ganz schwiereger Situatioun. Wéi vill aner Airlinnen och huet déi national Fluggesellschaft grouss finanziell Verloschter gemaach.

D'Gewerkschafte kritiséieren, den Aarbechtsdrock wier an der Lescht staark geklommen. Doriwwer wäert de Méindeg an enger sektorieller Tripartite rieds goen.

Den zoustännege grénge Minister François Bausch wäert mat de Gewerkschaften an der Luxair zesummekommen.

De Verwaltungsrot schreift, d'Reprise bei der Luxair wier schwiereg, mee d'Situatioun um Lëtzebuerger Flughafe wier däitlech besser wéi an aneren europäesche Länner.

D'Luxair wier am Gaange sech finanziell ze erkréie mee d'Perspektive wieren nach schwiereg.

Méi zum Thema

Fliger Luxair landen
Aviatioun

Beim Luxair-Personal ass d'Stëmmung net gutt. Extreem Flexibilitéit, héich Aarbechtsbelaaschtung an dobäi e Gel vun de Salairen. Kritiséiert gëtt d'Direktioun a virun allem de Gilles Feith.

Findel
Flughafen

Um Findel ginn et dem OGBL no keng chaotesch Zoustänn wéi op aneren europäesche Flughäfen. Beim Personal géif et awer Stress an eng héich Belaaschtung ginn, seet der Gewerkschaftlerin Michelle Cloos.

Net verpassen

Dossieren

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen